Gula 10
Pero dili gayod niya kapugngan ang iyang kaugalingon. Mangabubho gayod siya sa higayon nga iyang masaksihan ang matam-is nga pagminahalay nila ni Cody ug Alexa. Kun wala pa lang unta makigsuod si Cody kaniya kaniadto, tingali dili molipang sa iyang kasingkasing kining pagbatia.
Taudtaod nabati ni Colleen nga naabli ang dakong pultahan sa sala. Mibangon siya kay misantop sa iyang hunahuna nga mopauli na tingali si Cody. Milili siya sa may bentana. Tuod, iyang nakita didto sa gawas sila si Cody ug Alexa nga nag-agbayay samtang naglakaw. Gihatod gayod ni Alexa si Cody hangtod sa gawas sa koral sa ilang lagwerta.
Wala madugay dihay traysikol nga nagsingabot. Mihunong kini sa ilang tungod. Ug sa panabang sa sugang dagitabnon sa poste sa atbang, nakita ni Colleen nga gihagkan ni Cody si Alexa sa dayon na niining sakay sa traysikol.
Mora na usab og gikumot og tunokong mga kamot ang kahiladman ni Colleen. Misamot ang gibati niyang pangabubho.
Gitak-opan niya ang bentanang jalousie sa dihang nakita niya si Alexa nga mibalik na paingon sa balay. Mibiya sa bentana si Colleen ug mibalik sa nahimutangan sa iyang katre. Mihigda siya nga ang nagduladula sa hunahuna mao si Cody.
Hapit na ang tungang gabii sa dihang nahikatulog siya. -- Sumpayan pa