Kamatayon sa Panumpa - Gula 83

“Daghang salamat sa imong tabang,” giingnan ni Xenia si Norman dihang nagkita sila usa ka higayon niana. “Kun wa ka pa, tingali dili pa mahibalik sa normal ang akong kinabuhi hangtod karon.”

“Gibuhat ko lang ang akong katungdanan isip usa ka alagad sa balaod,” laktod nga tubag ni Norman.

Igo lang mipahiyom si Xenia.

“May ibalita diay ko nimo, Xenia,” gikan ni Norman.

“U-unsa kana?” Usisa ni Xenia.

“Natibuok na pagbalik ang akong pamilya. Mibalik na ang akong asawa ug mga anak sa among gipuy-an.”

“Kun mao kana, congratulations. Hinaot nga magpadayon ang inyong kamalipayon hangtod sa kahangtoran.

Paglabay sa kapin sa usa ka semana, si Xenia mibalik na pagtrabaho isip star singer sa UCV’s Sky Is The Limit. Hingpit na gyud nga nahibalik sa normal ang iyang kinabuhi.

Usa ka adlaw niana, miigo ang dakong sunog sa dapit nga gipuy-an ni Xenia sa Quiot. Nalakip sa pagkaugdaw ang iyang balay.

Wala na mobalik pagpatukod og balay si Xenia sa luna nga nahitarokan sa iyang balay nga nasunog. Nangabang na lang siya’g kuwarto sa usa ka balay sa Calamba. Nagpadayon gihapon siya pagtrabaho sa UCV’s. -- Taposon sunod gula