Gula 77
Pagkahuman, nakatulog si Xenia. Kaha gibati niya ang kakapoy tungod sa makutas nilang kombate sa kama.
Pagkabuntag, sayong gipukaw ni Reno si Xenia.
Sayong nangandam sila si Reno ug Xenia. Mosayo sila’g check out sa lodging house nga ilang giistaran. Human sa pamahaw mogikan na sila paingon sa airport diin adto sila manakay og eroplano paingon sa Manila. Kinahanglang makabiya na sila sa Sugbo!
Si Xenia ang unang naligo. Samtang didto siya sa banyo, si Reno mi-order og mga pagkaon alang sa ilang pamahaw. Human og kaligo ni Xenia, mibanos pagsulod si Reno sa banyo. Paggawas niini sa banyo (human og kaligo), nahiabot na ang mga pagkaon nga gi-order niini. Namahaw dayon sila.
Nag-ilis dayon sila human makakaon. Pagkahuman, mi-check out na sila. Sa gawas nga bahin sa lodging house nag-atang sila’g taxi nga kasakyan.
Wala dangti’g dugay, dihay sakyanan nga mikalit og hunong sa ilang tungod ug girakrakan sila sa mga nagsakay nga naghupot og armas nga tag-as og kalibre. Maayo gani kay nakabantay sila ug abtik nga nakapasalipod. -- Sumpayan pa