Balay ni Guada ungo way altar

Suod nga managhigala sila si Guada ug Patricia. Ang ilang panagsuod nagsukad pa sa nagtungha pa sila sa elementarya. Apan duna lay nakababag sa ilang panagsuod ug kini mao ang tabitabi nga ang inahan ni Guada nga si Dorothea hilabihang ka mangtas ug may nakakita nga nahimo kuno kining wakwak ug mikalit lang og lupad.

Bisan gani ang mga ginikanan ni Patricia nga sila si Alipio ug Binay mipasidaan man sa ilang anak nga dili gyud mokompiyansa bahin sa ilang panagsuod ni Guada.

“Kinsa goy nag-ingon nga ungo kana sila si Guada, Ma, Pa?” dihay kabalaka sa tingog ni Patricia nga nagpakisayod sa iyang mga ginikanan.

“Daghan na ang nakakita bahin sa pagka-ungo ni Dorothea ug kay iya mang anak si Guada natural nga kana si Guada ungo usab,” pintok nga namulong si Alipio ngadto sa anak.

“Mao kana,anak, busa ayaw gyud tawon og kompiyansa anang Guada, ug kun mahimo likayi na kana siya,” midugang si Binay nga inahan ni Patricia.

“Dili na nako mahimo, uy, Ma, Pa,” mirason si Patricia. “Suod na mi kaayo ni Guada ug sa akong nakita ug naobserbahan kaniya hilabihan kaayo kini ka buotan, unya ingon ninyo nga ungo...”

“Aw, kun dili ka gusto nga maputol ang inyong pagka-suod, panid-i lang si Guada. Matud pa sa mga karaang tawo, ang balay sa ungo way altar ug wala sab na sila’y salamin. Kun dad-on ka ni Guada sa ilang balay, susiha kuno kun duna ba silay altar...” pahayag ni Binay sa iyang anak dalaga.

Tuod, usa ka hapon niana dihang nagkuyog sila si Patricia ug Guada gikan sa eskuylahan kay namuhi na sila, miagni si Guada kang Patricia nga mangadto sila sa ilaha kay may salusalo kuno didto kay birthday sa iyang mama Dorothea. Dili unta mokuyog si Patricia apan naikog siya sa suod niyang higala maong misugot na lang siya sa pag-imbitar niini kaniya. Dunay mga bisita sila si Guada. Tingali, mga suod nga mga higala sa iyang mama ug papa o di ba mga paryente o kaliwat nila kining maong mga bisita.

“Dali, Pat, mangaon na ta, kay nagsugod na man ang kinan-anay,” agda ni Guada. “Kanang mga bisita namo, amo na silang mga kaliwat. Taga layong dapit na sila. Ang uban taga isla...”

Pagkakita ni Dorothea kang Patricia miduol kini ug miabiabi sa dalaga. “Uy, Patricia, kadako na nimo, uy, ug guwapa pa gyud kaayo. Komusta sila si mama ug papa nimo?”

“Okey ra man sila, Nang Doring,” mubong tubag ni Patricia. Unya gidala ni Guada si Patricia didto sa iyang kuwarto pagka human nila’g kaon ug didto sa sulod gipaliraw ni Patricia ang iyang mga mata sa sulod sa lawak ug wala gyud siya’y nakita nga altar.

“May gipangita ka, Pat?” ni Guada pa nga nakamatikod ni Patricia nga nagtutan-aw libot sa lawak.

“Hain man diay ang inyong altar, Guad?” ni Patricia pa. “Kilomkilom na man gud ug batasan namo nga mangaliya gyud bisag kadiyot lang sa mga oras nga orasyon nga ingon niaron...”

“Ha, kuan wa man mi altar, kay ginadili man na namo, Pat,” ni Guada pa nga seryoso ang hitsura. “Motuo ka’g dili, no, Pat, mga ungo man mi’g kaliwat. Pero, dili man mi mangunay og higala, labi na ikaw suod nako...”

“U-ungo diay mo, Guad,” dihay kalisang sa sinultihan ni Patricia. “Kuan, mouli na ko sa amo, Guad, uy, kay gabii na ra ba...”

“Gusto na kang mopauli, sige, baba lang nako, kay molupad na ko, diha lang ta agi sa bentana. Sige na, ayaw kahadlok, Pat, adto na ta...”

Ug tungod sa kahadlok miuyon na lang si Patricia. Didto motugpa si Guada sa pantawan nilang Patricia ug dali ra kaayo kini nga mibalik paglupad.

Ning higayona, wala gihapon makatingog si Patricia tungod sa kalisang sa nasayran niya sa pagka tawo ni Guada. Pagka-ugma iyang gisuginlan sila si papa ug mama niya bahin kang Guada nga milupad ug siya nagbaba diha sa luyo niini. (Kataposan)