Gula 72
Bang! Bang! Bang! Bang!
Gipasundan sila sa pagpusil sa mga tawong armado. Nakasiyagit si Xenia sa tumang kalisang.
Mibalos pagpabuto si Reno samtang nagdali sila pagkanaog sa hagdanan. Nag-una si Xenia. Nagsunod si Reno kaniya. Matag karon ug unya molingi si Reno sa ilang luyo aron pagsuta kun wala bay mga kaaway nga misunod kanila.
Bang! Bang! Bang!
Gipabuthan ni Reno ang usa ka kaaway nga mihana na’g kanaog sa hagdanan aron mosunod kanila. Naigo niya ang tawong armado. Nagkaligiray kini sa mga ang-ang sa hagdanan paingon sa ubos.
Nagpadayon sa pagkanaog sa hagdanan sila si Xenia ug Reno. Sa wala pa sila makaabot sa kinaubsan, mitipas sila’g laing agianan. Misantop sa hunahuna ni Reno nga tingalig may mga kaaway na nga nag-atang kanila didto sa kinaubsang bahin sa hagdanan maong sa fire exit na sila niagi.
Nalipat gyud nila ang mga kaaway. Pag-abot nila sa ubos -- sa luyong bahin sa hotel -- midali sila pagpalayo sa maong dapit. Sa unahan, mipara sila’g taxi ug nagpahatod ngadto sa Mandaue.
Sa usa ka lodging house sa gawas nga bahin sa Felicitas Village mi-check in sila si Xenia ug Reno. -- Sumpayan pa