“Kaganina ka ra man nga way timik,” ni Reno pa. “Unsa bay nahitabo nimo?
Wala motubag si Xenia sa pangutana ni Reno. Misumbalik hinuon siya pagpangutana ngadto niini.
“Sultihi ko’s matuod, Reno,” ni Xenia. “Kinsa ka ba gyud diay. Nganong may armas ka? Ug nganong may mga tawo man nga gustong mopatay nimo?”
Wala motubag si Reno sa pangutana ni Xenia. Igo lang kining mibuhi og lawom nga panghupaw. Unya nagpanglingo kini sa iyang atubangan.
“Tubaga ang akong pangutana, Reno,” gikan ni Xenia. “Pasabta ko’g maayo bahin sa imong pagkatawo. Nganong gusto ka mang patyon niadtong mga tawong armado nga migukod kanato?”
“Usa ako ka sakop sa Salandanan Robbery Group,” misugod na pagtug-an si Reno. “Ug kadtong mga tawo nga migukod kanato akong mga kauban sa grupo.”
“U-unsa?”
“Mao kana, Xenia. Membro ako sa grupo sa mga tulisan nga maoy responsable sa serye sa mga dagkong tulis dinhi sa dakbayan sa Sugbo.”
“Kun tinuod nga sakop sab sa Salandanan Robbery Group kadtong mga tawo nga migukod kanato, nganong gusto ka man nilang patyon nga imo man silang mga kauban?” -- Sumpayan pa