“Da, Binyang bisan og unsaon nimog pamustora diha sa samin wala nay molingi nimo kay singkuwenta anyos kapin na ang imong edad. Nangunot ka na!”, singhag pa nga nagdala og pagmahay ang tingog ni Inse Lilay ngadto sa iyang bugtong anak samtang nagharos sa kamunggay usa ka udto niana.
Bag-ong naligo si Binyang sa ilang atabay ug sa pagkahuman niya og ilis nanamin kini ug nagsil-ing sil-ing sa iyang hitsura diha sa samin.
Mipadayon si Inse Lilay ... “Kaniadto unta to daghan tong naninguha nimo sama nila ni Talino nga karon maestro na. Diha pa toy anak og yutaan sa lungsod nga si Fredo. Og si Tonyo pa gyod nga magpunay ra ba to’g dala og regalo bisan unsa na lang kada pamisita kanimo. Apan silang tanan giayran ug pulos mo silang gibalibaran sa dakong kasayon. Gisulinganhan og giinistriktahan pa nimo sila. Wala kang pansin kanila bisan konting pagtingin na lang!”
“Si kinsa pa may gipaguwapahan nimo karon nga lawos ka naman?” dugang pang bagutbot sa baba nga nabati ni Binyang gikan sa iyang inahan nga karon nagtak-ang na sa kulon sa sug-ang sa otan nga ilang sud-an karong udtoha.
“Ada, pilay palad kun aduna pay masaag ngari kanako,”pintok nga tubag ni Binyang samtang naghapohap-hapohap sa iyang agtang ug aping atubangan sa samin. Hitsuraan baya kini si Binyang. Bus-ok ang iyang kalawasan. Lamorok ang iyang kaapingan ug may pagkamanokon ang iyang mga mata. Apan karon, wala na kay nangunot ug lawos na siya. May batasan si Binyang nga pagkahingawayon, libakira, insultador ug maldita pa gyod. Matapobre usab siya.
Sa iyang hunahuna, siya ra gyoy hawod ug perpekta nga pagkatawo ning kalibotana. Pipila pa lang ka bulan nga nabiyudo si Estong nga ilang silingan. Nakagusto unta ang biyudo kaniya kay susama ra sila og pangidaron apan ang mga anak sa nahauna dakong supak nga maminyo og usab ang ilang amahan ngadto kang Binyang gumikan lagi sa batasan nga gihuptan sa naulahi. Ug karon, miabot na ang panahon nga nagbasol si Binyang kay sa iyaha karong pangidaron wala siyay liwat bisan usa nalang ka buok.
Nahunahuna niya karon nga siya ug si Nanay Lilay niya kun sa adlaw pa sila hapit na motunod kon mosawop sa kahaponon.
Busa, dili maayo nga ang atong mga kababayen-an ipatigbabaw nila ang hilabihang pagkahimilian ug sa pagkamaldita nga wala sa lugar kay mahisama unya sila kang Binyang nga nangunot na ug wala nay molingi! (Kataposan)