Apan dili siya makahimo pagdawat sa gitanyag ni Reno. Dili mahimong makigrelasyon siya sa lalaking wala niya higugmaa. Bisan og nahitumpawak siya sa trabaho diin daw wala nay bili ang gugma apan alang kaniya, mas mahinungdanon pa gihapon ang pagsunod sa pinitik sa kasingkasing kun maoy tuyo ang seryosong pagpakigrelasyon.
“Salamat na lang sa tanyag, Reno,” giingnan ni Xenia si Reno. “Pero dili ko makadawat sa imong offer.”
“Sa unsang hinungdan?” pakitubod ni Reno.
“Dili pa ko andam sa mas seryusong commitment.”
Wala siya pugsa ni Reno. Pero nagpadayon gihapon kini sa pagpangulitawo kaniya.
Mibati man gani og kabalaka si Xenia nga tingalig mag-abot sila si Norman ug Reno sa club nga iyang gitrabahoan. Nangulitawo ra ba usab si Norman kaniya -- mas una pa kay kang Reno. Tingalig magkalalis ang duha kun magkasayranay nga pareho silang nangulitawo kaniya.
Ang gikabalak-an ni Xenia nahitabo gayod. Usa ka gabii niana, sayong nahiabot si Norman sa club. Gi-table siya niini. Pagkataudtaod nahiabot si Reno ug miduol kini sa lamesa nga ilang nahimutangan. Sa walay lipudlipod nga panagsulti, nagkasayranay gyud ang duha nga pareho silang nanguyab kang Xenia. Apan wala maglalis ang duha tungod kaniya. Naghimo hinuon og gentlemen’s agreement ang duha. -- Sumpayan pa