Kamatayon sa panumpa

Nadala na usab si Xenia ni Reno sa usa ka bugnaw nga lawak. Naangkon na niini ang katam-is sa iyang pagka babaye. Pero kutob ra diha ang iyang pagpakiglambigit kang Reno. Gibalibaran niya ang gugmang gihalad niini kaniya. Wala siya’y pagbati alang kang Reno.

Usa ka higayon niana, sakay sa kaugalingon niining sakyanan, gihatod ni Reno si Xenia gikan sa UCV’s ngadto sa iyang gipuy-an sa Quiot. Dili man unta magpahatod si Xenia apan namugos gayod si Reno kay gusto kining makatultol sa iyang gipuy-an. “Kuyaw sa sunog tong imong gipuy-an sa Quiot,” giingnan si Xenia ni Reno dihang nagkita sila sa club pagkasunod gabii. “Delikado sa sunog.”

“Bitaw,” ni Xenia pa. “Pero naanad na ako sa maong dapit.”

“Dili ka na magpuyo sa maong dapit kun dawaton mo ang akong gugma, Xenia,” ni Reno pa. “Pabalhinon ko ikaw’g puyo sa usa ka apartment o sa usa ka townhouse. Depende kun unsay imong gusto.”

Alang kang Xenia, very tempting ang gitanyag ni Reno kaniya. Nasayod siyang maka-afford si Reno pagtuman sa gipasalig niini kaniya nga magpuyo siya sa kaharuhay. Nga dili na unya siya magpuyo sa gubaon na nilang balay sa Quiot (nga kabilin niya sa namatay niyang mga ginikanan) kun iyang dawaton ang gugma ni Reno. -- Sumpayan pa