Wala dangtig dugay, si Xenia nahimo nang Star Singer sa UCV’s Sky Is The Limit. Ingon gani sa nasina ang ubang singer sa club kaniya kay mora man og gihatagan siya’g special treatment sa manager sa entertainment club nga iyang gialagaran.
“Pasagdi na sila,” ni Penelope pa. “Wa sila’y mahimo kay pagbuot man ni Madam Minorka ang matuman dinhi sa club.”
Tungod sa maayong performance ni Xenia isip star singer sa UCV ‘s Sky Is The Limit, siya’y labing kinaham nga singer sa mga kustomer sa club. Pangitaon gyud siya sa mga kustomer sa club matag gabii.
Hangtod nga sa kadugayan, diha nay mga kustomer nga gustong makig-table kaniya. Gawas nga nahimuot sila sa iyang singing performance, nadani usab sila sa iyang katahom.
Apan wala itugot sa management sa club nga makig-table ang mga singer ngadto sa mga kustomer. Ang mga dancer ray gitugotan sa pagpakig-table sa mga kustomer. Busa, kutob ra sa pagtan-aw ang mga kustomer nga naglaway sa kaibog sa talagsaong katahom ni Xenia.
Apan miabot gyud ang panahon nga si Xenia wala na makalikay sa tawo nga may interes kaniya. Usa ka gabii niana, misulod sa club si Mr. Waldon, usa ka tinamod nga magpapatigayon sa dakbayan sa Sugbo. Nasayod si Mr. Waldon sa mga patakaran sa club. Apan si Madam Minorka maoy gipakigsultihan niini nga i-table si Xenia. Suod nga managhigala sila si Madam Minorka ug Mr. Waldon maong wala makabalibad ang manager sa club. -- Sumpayan pa