“Sa UCV’s Sky Is The Limit,” tubag ni Penelope.
“Unsa man nang UCV’s Sky Is The Limit?” Nakapangutana si Xenia.
“Usa ka entertainment club,” pasabot ni Penelope. “Singer ko sa maong club. May back-up kong mga banda.”
“Diay ba?”
“Ikaw? Hain ka man magtrabaho?” Pakisusi usab ni Penelope.
Gitug-anan ni Xenia si Penelope nga wala na siya’y trabaho ug nagpadayon pa siya pagpangita’g laing trabaho.
“Kun interesado ka ipaila ko ikaw sa among manager,” ni Penelope pa. “Nindot man sab ka’g tingog. Tingalig makauyon siya nimo ug kuhaon sab ka niyang singer sa iyang balay-kalingawan.”
Sa sinugdanan nagduhaduha pagsanong si Xenia. Daghan og reserbasyon ang iyang hunahuna. Apan sa kadugayan, nakahukom siyang mo-apply pagka-singer sa entertainment club nga gitrabahoan ni Penelope.
Mikuyog si Xenia kang Penelope ngadto sa UCV’s Sky Is The Limit. Gipaila siya ni Penelope ngadto ni Madam Minorka, ang manager sa club. Gisuginlan ni Penelope ang manager nga si Xenia gustong motrabaho isip singer sa entertainment club. -- Sumpayan pa