Anino sa kulto

GULA 203

Mikipatkipat ang mga mata ni Carlo. Gisulayan niya’g hunahuna kun unsay sala nga iyang nahimo ngadto kang Maj. Campo. Apan wala gayod siya’y nahinumdoman.

Niining higayona, nagpabilin sa kahilom sila si Belen, Jimmy, Tiyo Berto ug Padre Daniel. Namati lang sila sa gipanagsultihan sa duha. Ang lima ka kauban sa hepe nagpalayo og diyotay.

“Dako ka kaayo’g sala nga nahimo kanako, Mr. Guieb,” matud na usab sa hepe. “Mabayran lang kini pinaagi sa imong kamatayon. Kinabuhi ang imong giutang busa kinabuhi usab ang imong ibayad.”

“U-unsa?” miliraw ang mga mata ni Carlo nga giabot og kalibog.

“Wala ka pa makaila sa hingpit kanako, Mr. Guieb,” may tamihid nga mibathay sa panagway sa hepe. “Daghan ka pag wala hisayri mahitungod sa matuod kong pagkatawo.”

“Nakaila na ako kanimo,” nagkanayon si Carlo. “Ikaw maoy matang sa tawo nga mahiligon sa pagtakoban. Makadaghan ka na mag-ilis-ilis og identity. Migamit ka sa daghang mga alyas. Sa gihimong background check sa kauban kong detektib, nasayran namo nga migamit ka sa ngalan nga Ramon Diaz sa dihang sakop ka pa sa kapolisan sa usa ka lungsod sa Mindoro. Nasayran sab namo nga migamit ka sa mga ngalan nga Luis Navarro, Miguel Valdez, Sancho Ramirez ug Dante Gatmatian. Ang ako lang gikabeliban nimo tungod kay wala ka gyud hisakpi sa mga awtoridad nianang imong pagka-impostor.”

“Dili lisod ang pag-usab sa identity, Mr. Guieb, kun aduna kay kuwarta tungod kay anaay daghang mga corrupt nga opisyal sa kagamhanan nga andam motrabaho sa gusto natong ipatrabaho.”

“Apan wala gayod diay aso nga makumkom, Maj. Campo. Karon ang kahigayonan na gayod ang naggahas og dalan aron akong masayran nga usa lang diay ka maskara kadtong panagway nga nagdala niadtong lima ka ngalan. Ug karon nasayran ko na ang matuod mong identity kana kun dili artificial kanang imong panagway.” -- Sumpayan pa