Ang mutya sa saging tindok

Ikalima na kagabii, kining pagtukaw ni Kadyo sa pagbantay sa saging tindok nga iyang gitanom sa iyang uma taliwala sa lasang nga iyang gikaingin dinhi sa bukid sa Mahabos, sakop sa Barangay San Vicente, Bislig City, Surigao del Sur.

Ang iyang gibantayan dili ang mga kawatan. Ang tuyo ug tumong sa iyang tinguha. Aron lang siya makaangkon sa mutya, gikan sa saging tindok nga namunga.

Busa sa pagpamuso sa saging nga tindok niyang tinanom, ania siya magbantay sa tungod niini. May lantay siya nga kawayan gihigdaan. Unya may gibaskad siya nga banig.

Aron sa pagkahulog sa Mutya sa saging tindok. Diin mahatagpilaw siya sa katulogon ug mahinanok. Nakaseguro siya nga makamatngon ug makamata.

Unya, samtang naghigda siya sa lantay nga kawayan maoy iyang nahinumdoman si Ingko Talyo nga iyang uyoan nga gidungog usab nga may mutya sa saging tindok nga gihuptan.

"Timan-i kini pag-ayo Kadyo. Dili sayon angkunon ang mutya sa saging tindok. Dumogon ikaw niini sa daghang mga demonyo. Makig-away ka kanila sa manomano. Layog ug sumbagay.!"

"Kun anaa na gani kanimo, ang mutya, ugoma dayon kini ug kanila pakigsangka!" Kini ang mga pulong, ang nanagingting sa sulod sa iyang panumdoman.

"Oo, Ingko Talyo!" tubag usab niya sa iyang uyoan nga sa iyang kaugalingon masaligon.

Sa ilang pag-estoryahay kagahapon dinhi sa iyang umahan." Maningkamot gayod ako sa pagsukol kanila!" maoy pasalig niya.

"Pagbuswak gayod sa puso sa saging mong tindok, andama ang imong 'flashlight' aron kaiwagan nimo dayon ang mutya sa saging tindok niining mahulog!" ni Ingko pa niya Talyo nga mapahimangnuon. "Timan-i gyod kana!"

Mihagtok na gayod ang alas dose ang takna sa kagabhion. Ang mga dahon sa saging tindok misayaw dihang gihuyop sa hangin. Nataktak ang mutya. Gitamwagan dayon ni Kadyo sa iyang espat. Gipunit dayon niya kini ug giugom.

Apan igo palang gani nakatak-om ang iyang baba gidasmagan dayon siya lima ka itom mga anino. Mga agta diay kini nga gusto usab sa mutya sa saging tindok nga manag-iya.

"Ha-ha-haaa!" mikatawa ang mga agta nga iyang gikasangka." He-he-heee! Dili ikaw Kadyo maoy makatag-iya, nianang mutya. Kamiiii! Nakasabot kabaa?"

"Ah, dili mahimo! Akoy nakauna nini, kaninyo!" tubag usab ni Kadyo nga maisugon kaayo misumbag sa mga agta nga mitabang kaniya.

Apan tungod kay nag-inusara lang si Kadyo sa pakig-away sa lima ka mga agta nag-anam na siya unta, kaluya. Mga dagko ug maskulado ang lima ka agta. Ug sayon kaayo siya gilamba niini sa yuta. Nahutdan na unta, siya og hangin sa pakigsangka sa lima ka mga agta.

Apan kalit lang usab mitungha si Ingko Talyo niya nga nagdala sa bahi nga ulisi. Tungod sa iyang pagkamaayong eskrimador, gumikan usab sa 'Anting-Anting' niining Mutya sa saging tindok sa panahon sa iyang kabatan-on. Kalit lamang naglumba sa pagpanagan ang lima ka mga agta nga mitabang kaniya.

"Daghang salamat, Ingko Talyo, sa imong pagluwas kanako!" ni Kadyo pa nga mibangon gikan sa yuta nga iyang natumbahan. "Kun wala kapa, Ingko Talyo mahiabot patay na tingali ako karon!"

"Ikaw ra Kadyo, ang bugtong nako nga pag-umangkon, ang kabinlan sa akong 'anting-anting' nga sa pagka karon anaa kanimo. Busa giluwas ko ikaw! sukad karon ... ikaw na usab ang sumusunod kanako!" ni Ingko Talyo pa, nga miagbay sa abaga ni Kadyo. (Kataposan)