Gula 70
Natugkad ni Urielle nga ingon sa dili gusto si Patrick nga hisgotan ang mahitungod sa ilang sex life. Bayot kaha si Patrick hinungdan nga wala kini interes nga makig-sex sa usa ka babaye? Gikasukot sa hilom ni Urielle kining maong pangutana sa iyang kaugalingon.
Apan siya ra usab ang mihatag og tubag sa pangutana nga iyang gisukna sa iyang kaugalingon. Dili bayot si Patrick. Wala sa pamayhon niini ang timailhan nga usa kini ka mahuyang. Makadaghan na siya makakita kang Patrick nga maghukas, ilabi na kun gikan kining naligo. Macho si Patrick. Bus-ok kaayo’g lawas. Mora’g kanunay nag-gym. Maong dili katuohan nga bayot kini. Aduna lang gayo’y lig-ong katarongan kun nganong wala pa gayod niini angkona ang iyang pagka-babaye. Kun unsa kini, mao kana ang buot sutaon ni Urielle.
Sayo silang nanihapon. Mao na kini ang ilang naandan. Gawas lang sa mga higayon nga madugay sa pagpauli si Patrick kay malangan og diyotay ang ilang panihapon. Dili man usab mokaon si Urielle kun dili sila magkadungan ni Patrick.
“Sa sunod adlaw,” ni Patrick pa samtang nangaon sila, “kuyog nako sa akong gitrabahoan.”
“Nga-ngano man?” Sukit ni Urielle.
“61st anniversary sa among kompaniya,” maoy tubag. “Dunay salo-salo nga ipahigayon. Ug giawhag kaming tanan nga dad-on gyud ang among mga asawa o bana atol sa maong okasyon.” -- Sumpayan pa