Gula 50
Gikuha ni Patrick ang resibo nga gipatong sa tray aron pagsuta kun pilay balayranan sa gi-order nilang pagkaon. Mikuha dayon si Patrick og kuwarta gikan sa pitaka niini human tamdi ang resibo. Migawas dayon ang tig-alagad sa hotel human makabayad si Patrick.
“Mangaon na ta,” agda ni Patrick kang Urielle.
Mitindog si Urielle ug miduol sa lamesa nga nahimutangan sa mga pagkaon. Nangaon sila nga walay tingogay.
“Gusto kang mokuyog nako?” Gisukit si Urielle ni Patrick human sa ilang pangaon.
“A-asa ka man diay?” Sukit ni Urielle.
“Moadto ko sa coffee shoppe ning hotel. Basin may kalingawan didto.”
“Ikaw lang tingali. Dinhi lang ko.”
“Okey...di man sab ko magdugay didto.”
Migawas si Patrick sa lawak. Sa hilom mibati’g kalipay si Urielle. Nangindahay siya nga unta dili na lang mobalik si Patrick sa ilang lawak niining gabhiona...kay dili pa siya andam kun may mahitabo kanila.
Lawom nang gabii apan wala pa makatulog si Urielle. Gipaabot niya ang pagbalik ni Patrick. Ang tinuod, dili siya buot nga moabot ang higayon nga mobalik si Patrick sa lawak sa hotel nga ilang giokupahan. Apan nasayod siyang mobalik gayod si Patrick. Gusto siyang magmata pa inig-abot ni Patrick. -- Sumpayan pa