Gula 49
“Gipangita ka sa atong mga bisita,” matud ni Patrick human ikabutang ang awditibo. “Pero ako silang giingnan nga mipahuway ka. Gipasabot ko sila sa hinungdan -- nga gikapoy ka.”
“Sila si Tatay ug Nanay?” Usisa ni Urielle.
“Namauli na sa Tuburan,” maoy tubag. “Misakay sila sa sakyanan nilang Daddy ug Mommy. Wa na lang sila makigkita nimo aron dili matugaw ang imong pagpahuway.”
Wala na motubay si Urielle sa gisulti ni Patrick. Mibangon siya ug mipaingon sa CR aron pagtubag sa sugo sa lawas.
Paggawas niya sa banyo, iyang natukmaan si Patrick nga nag-ilis og sinina. Wala siya makalikay pagtan-aw sa naglis-oklis-ok nga dughan niini. May mga balhibo sa dughan ang lalaki. Macho si Patrick!
“Wala ka ba batia’g kalaay dinhi nga mao rang usa kaganina?” Sukit ni Patrick nga human na nakailis.
“Wa man,” niya pa.“Nalingaw ko’g tan-aw sa salida sa TV. hangtod nga nakatulog ko.”
Naputol ang ilang panagsulti dihang may nag-buzzer sa pultahan sa lawak nga ilang giokupahan. Mitindog si Patrick ug mipaingon sa pultahan aron magsusi. Ang crew diay sa hotel nga nahiabot nga naghatod sa ilang pagkaon. Gipasulod kini ni Patrick aron ipahimutang ang pagkaon sa ibabaw sa lamesa. -- Sumpayan pa