Anino sa kulto

Gula 123

“Balikan ta ang bahin sa bata nga gikidnap, Carlo,” namulong si Maj. Campo pagkilab sa pipila ka daklit. “Unsay maayo natong buhaton karon? Nabalaka ako nga may daotang mahitabo kaniya sa mga sakop sa kulto.”

“Mao usab kanay akong gikabalak-an karon, Dick,” matud ni Carlo nga tinud-anay nga mibati’g kahingawa. “Biyernes karon ug sumala sa atong nasayran, iatol sa mga Tambayawan ang pagpatay sa bata nga ilang biktimahon sa adlaw’ng Biyernes.”

“Mabuthan na sab ko niini sa mayor,” sa hepe pa.

“May panahon pa kita sa pagpangita sa bata hangtod sa kabuntagon, Dick,” nagkanayon si Carlo nga mitutok sa hepe.

“Apan asa man nato siya pangitaa?” sukit ni hepe. “Nalukop na nato’g suhid ang tanang dapit niining lungsora apan wala nato makaplagi ang bata. Nagpatabang na gani ko sa kapolisan sa kasikbit nga mga lungsod apan wala usab sila’y nahimo.”

Nahatiurok si Carlo. Gipamalandongan niya ang gipamulong sa hepe. Miabot kaniya ang kahiamgo nga maglisod gayod sila sa pagpangita sa bata nga gikidnap. Wala sila’y kalainan sa usa ka mananagat nga milugos pagsalom sa lubog kaayong tubig.

 Wala tuyoa, nabuhian ni Carlo ang usa ka halawom nga panghupaw. Gidat-ogan siya sa dako nga kahisagmuyo.

Buntag sayo sa adlaw’ng Sabado. Naukay ang mga lumolupyo sa Tambo, usa ka balangay nga sakop sa lungsod sa Mabini. May patay’ng lawas sa usa ka batang babaye nga nakaplagan sa darohan. Usa ka mag-uuma ang nakabangal niini. Gidudahan sa mga awtoridad nga gilabay sa mga responsable sa krimen ang bata ngadto sa darohan human kini patya. May baraw nga nagtaop sa dughan sa biktima nga may marka nga 666. Si Carlo ug ang kapolisan nagkauyon sa usa ka konklusyon: biktima ang bata nga gipatay sa Tambayawan Black Brotherhood. -- Sumpayan pa