“Ayaw lang kauwaw nako,” ni Patrick pa nga ingon sa nakamatikod nga nataha siya niini. “Kinahanglang mag-anad-anad ka na. Pipila ka adlaw gikan karon, imo na kong bana.”
Wala siya motingog. Ingon sa giingogan siya sa iyang nadungog gikan kang Patrick. Tugob sa respeto ang pagbungat ni Patrick sa maong mga pulong apan nanglimbawot ang iyang mga balhibo pagkabati niini. Karon pa niya masinati nga lahi diay kaayo ang bation sa usa ka babaye nga makig-atubang sa lalaki nga kalit lang niyang nahimong pamanhunon bisan wala kini niya mahimong hinigugma. Bakikaw gyud kaayong hunahunaon!
Apan nia na kini. Dili na makasibog si Urielle tungod kay naluwatan na niya ang iyang pag-uyon. Busa mopahinayak na lang gayod siya. “Gusto kong makasal gilayon ang atong mga anak, Pre,” mapahiyomong misangpit si Don Emilio ngadto kang Noy Sidro. “Gusto na man gud kong makakita sa akong apo.”
“Nag-agad lang mi ninyo, Sir,” ni Noy Sidro pa.
“Unsay Sir?” Buyag ni Don Emilio nga nagkatawa.
“Aw, P-pre diay,” matud sa amahan ni Urielle nga ingon sa mibati usab og kabakikaw nga makigkompare sa agalon niini.
“Kun unsay inyong desisyon, Pre,” ni Nang Marciana pa usab, “kana ang among sundon.”-- Sumpayan pa