“Buotan siya, no,” ni Nelson dihang didto na sa layo sila si Patrick.
“Tinuod kana,” matud ni Urielle. “Lahi si Sir Patrick sa ubang mga anak og dato.”
“Dugay na mong nagkaila?”
“Oo. Magkanunayan man siya dinhi kun makabakasyon. Tua na siya magtrabaho sa dakbayan sa Sugbo.”
“Kinsa man tong iyang kuyog?”
“Si Chariz to. Iyang hinigugma.”
“Mora lagi’g estrikta tong babayhana.”
“Dili baya. Hilomon lang gyud siya. Pero motubay man kun pakigsultihan.”
Nahilom si Nelson.
“Nagkasabot na man kuno kana silang magpakasal,” gikan ni Urielle. “Ambot kun kanus-a.”
“Kita, Urielle,” ni Nelson pa. “Kanus-a man sab ta magminyo?”
“Saba diha, uy.”
“Bitaw, Urielle. Dugay-dugay na man sab ang atong relasyon. Mahimo man tingaling magminyo na ta.”
“Ayaw una karon. Tingali sa sunod tuig, puyde na.”
“Ngano man gud diay kun karon na lang?”
“Dili pa ko andam. Sa sunod tuig na lagi.”
“Buyno, ikaw ang mag-igo. Mas maayo sab hinuon aron madugangan pa kadtong akong tinigom.” -- Sumpayan pa