Gula 6
Wala na makabalibad si Letty sa panghangyo ni Manny nga manulod sila’g motel. Gigamhan g’yud siya sa grabe kaayong kahinam sa pagromansa kaniya ni Manny mao nga wala na siya makabantay nga nahikap na sa ulitawo ang tanan niyang kalawasan.
Naggunitay sila si Manny ug Letty nga nanggawas sa sinehan nga ilang gisudlan. Hilom kaayo si Letty kay nahuna-huna niya unsay sunod nga mahitabo nga misugot siyang mouban ni Manny sa motel. Dayon misakay sila og taksi.
“Sa V. Rama lang Bay kanang bag-ong motel diha,” giingnan ni Manny ang taksi drayber nga wala lang motingog ug mipaturatoy lang sa pagpadagan.
Pag-abut nila sa motel, nagdali sila nga nanaug samtang naglingi-lingi nga wala bay nakaila kanila. Misulod dayon sila sa usa sa mga lawak nga gibuksan nang daan sa room boy.
Dihang didto na sila sa sulod, gigakus dayon ni Manny si Letty ug giukoban ang mga ngabil sa mainit kaayong hawok. Dugay nga milunga si Manny sa pag-ukob sa ngabil ni Letty.
Hinay dayon niya kini nga gipahigda sa kama ug padayon nga gipabatyag sa kalalim sa romansa. Tagsa-tagsa nga gipanangtang ni Manny ang gisul-ob nga sapot ni Letty.
Wala tuyoa ni Letty nga nahanduraw niya si Nestor, ang iyang hinigugma sa probinsya. “Basin kun tua ka na unya sa syudad Let, imo na lang ko nga kalimtan,” takulahaw lang mipasunding kining maong pulong ni Nestor sa huna-huna ni Letty.
Wala pa siya malimot nga gisaaran niya si Nestor nga dili gayud mangita’g lain kay iya na gani nga gitugyan sa hinigugma ang iyang pagkababaye didto sa balay’ng karaan ni Ingko Abdon.
Apan bisan og naghanduraw si Letty sa iyang hinigugma nga gibiyaan niya sa ilang dapit sa Bogo, dili na siya makalikay sa pagbudhi sa ilang saad. Nabatyag na niya karon ang kalalim sa padayong pagromansa ni Manny kaniya.
Wala gayud makapugong si Letty nga nakalit-ad ug nakaagumod sa kagilok ug kalalim sa dihang giungad ni Manny ang tibuok niyang kalawasan.
Nahitabo g’yud sila si Manny ug Letty. Human sa ilang kumbati sa kama, naghinuktok si Letty. Nakabantay niini si Manny.
“Nganong naghinuktok ka man Let? Nagmahay ka ba nga may nahitabo kanato,” gisukna siya ni Manny.
“Wala lang, nahinumdom ko sa akong hinigugma nga akong gibiyaan sa probinsya. Nakasala na ko sa among gipanumpaan kay gawas nga nakigrelasyon ko ug lain gitugyan ko pa g’yud kanimo ang akong pagka babaye,” matud ni Letty. (Sumpayan pa)