Hi, Em, gret lng kog gd mrnng. Nagteks ko ni Emma usa ka buntag niana. Pagkataudtaod mi-response siya: Mar, pls. ayaw n pagteks nko. I-delete na ako nmber kay ang imo ako na gidelete, w nay lama sa u number nagpabilin diri.
"Di ko kaako, Em. Ndutlan gyod ko nimo." Miteks na sab ko. "Magkita ta."
"Mar, wla koy plno nga moguba sa panagtiayon nn'u ni Jocelyn, sulagma ra nga naka2bay ko nimo, so, mangau kog sory nga nakatxt q nimo, usbon nku sory Mar..."
Morag gihilap ang akong kasingkasing. Akoa nalang gyong gitawagan si Emma apan mao na lay akong nabati ang: "The number you have dialed is either unattended or out of coverage area..."
Gi-off na ni Emma ang iyang selpon. Sa akong paghangad sa Kahitas-an akong nakita nga gidag-oman ang langit. Ug wa madugay mitaligsik. Unya akong nabatyagan nga diha say laing taligsik nga mitulo gikan sa akong mga mata. nagkateksmet mi si Emma pinaagi sa tulumanon sa radyo nga "Kuya, Maayong Hapon..." nga gidumala ni JTY. Sa nadugay namong teksanay nagkasabot ang among masigka pagbati. Na-touched si Emma sa akong mga text messages nga balaknon kaayo.
Mikusog ang ulan. Misulod ko sa balay. Didto ra ko hangtod sa pagkaudto. Unya human makapaniudto, gipatingog nako ang gamay kong radyo ug nagpaabot ko sa oras sa programa ni JTY. Mihigda ko sa sopa ug naggunit sa akong selpon.
Nagsugod na ang programa ni JTY. Nindot kaayo ang mga music nga iyang gipalanog sa kahanginan. Makapatandog gyod sa balatian ilabi na ang background nga instrumental kanang mobasa na siya sa mga suwat-suliran gikan sa mga tigpaminaw.
Pagkataudtaod mibasa na sab si JTY sa mga greetings nga gipadangat pinaagi sa pagteks sa selpon...
"Kuya maayong hapon. plihog ko pa2kar sa awit ni Rey Valera nga nag-ulohan Alaala nga akong ipahinungod ni Mar. Gkan n Emma."
Abi nako’g gikalimtan na gyod kong Emma. Busa nadasig ko pagteks ug akong gi-send niya: "Na-touched kaau kos maong awit. Nabugto n gyong kwerdas sa gitara nga nagbitay s akong ksing2, Em."
Unya mi-reply si Emma: "a2ng isumpay pgbalik Mar..."
Mi-response dayon ko: "Wa na. Gabok na gitay-an n s pnhon. Msumpay man tuod apan molibkas r gihpon. W nay kpuslanan, igo n lng s paghndom."
"Dghana sd nimo mga pasumbingay oi, mglisud q pg'apas balaknon au k liwat k imu pa2..." Ni Emma na sab.
Sa gawas mituang na ang ulan. Natapos ang programa ni JTY. Mi-reply na sab kong Emma apan sa akong pag-send: "Check operator services."
Pagkagabii dugay kong nakatulog. Nahanduraw nako ang akong asawang si Jocelyn ug ang duha namo ka mga anak. Unsa na kaha sila karon nga wa pa man gyod ko makapadala kay na-hold ang among suweldo? Nakapangutana ko sa akong kaugalingon. Unya miteks na pod si Emma: "Oke ra ko Mar, cge jafon ta frnds na lng dili selosa imu asawa?''
Unya may nakita kong kahayag sa gawas lahos sa jalousy. Nahadlok na hinuon ko nga tingalig ang friendship ma-develop pa ngadto sa mas bug-at nga pagbati. Maungkag ang akong pamilya! Busa nakahukom ko... Sa dihang nakobra na nakog tingob ang akong suweldo mipauli ko sa Negros. Pagsakay nako sa lansa gikan sa Bato, Oslob paingon sa Tampi, nagkadaiya ang pagbati nga nagpangusi sa akong kahiladman kay nindot kaayo ang mga awit nga gitugtog sa FM Station sa stereo sa lansa. Akong gikuot ang selpon sa akong bulsa unya akong gitangtang ang simcard diin na-saved ang mga text messages ni Emma ug ang iyang number. Ug didto sa nagdagtom nga lawod akong gilabay ang simcard.
Unya...sungog ba gayod kaha sa panahon? Nanganawkanaw gikan sa stereo sa lansa ang awit ni Rey Valera nga "Alaala". Mihapdos ang akong kasingkasing. (Kataposan)