Sus mariosep! Hain na man karon ang akong bag-ong karsones nga gibitay ko sa lansang sa pultahan sa kuwarto ning pension house? Lakip ang sapatos ko ug medyas nawala! nakapangutana si Iko sa iyang kaugalingon nga puno sa kabalisa ug kaguol. Miliraw ang iyang mga mata nga misuhid sa tibuok lawak nga iyang gi-check-inan pagkahuman niya’g kobra sa kuwatro mil ka pesos isip pahalipay ngadto sa mga senior citizen sa dakbayan sa Sugbo ubos sa pamunoan ni Mayor Tommy Osmeña.
Bag-o pa siyang nahigmata kay nagpa-relax siya sa iyang kaugalingon sulod sa pension house. Pagkatapos gud niya og kobra sa nahisgotang kantidad midiretso siya sa usa ka massage parlor diin batan-on tong babaye nga masahista ang iyang napilian nga maoy mihilot-hilot niya sulod sa mabugnaw'ng kuwarto sa pension house.
Gibayran niya’g multa kon fine ang masahista nga nagustohan niya aron lang gyod madala niya sa usa ka pension house.
Apan unsa mang hitaboa nga brief na man lang ang nahibilin niya nga tapot karon sa iyang hubo nga kalawasan. Namora na hinoon siya karon og si Tarzan nga salida sa sine.
Nahitagpilaw man god siya kay giaplayan man siya sa masahista og 'lingam massage' diin dili gyod matukib ang kalalim ug kaanindot ang gipamati niya sa iyang kalawasan.
"Gibiyaan sab diay ko sa masahistang batan-on samtang nahinanok ko sa makadiyot nga panahon?" nakatuaw siya nga may dalang pagmahay ang tuno sa iyang tingog.
Nanghupaw siya og halawom ug naghinuktok nga mao dang usa nga naglingkod sa eskina sa kama sa kuwarto nga iyang gi-check-inan.
Kuwenta-kuwenta niya may kapin pa to sa dos mil ka pesos ang nahibilin niyang kuwarta nga didto niya gisuksok sa medyas sa iyang sapatos nga naapil usab sa pagkahanaw.
Ang dako niyang problema karon kay wala pa siya kapalit og tambal alang sa nagmasakiton niyang asawa nga si Klaring.
Si Klaring ugod taod-taod nang nalaygay sa sakit niyang lipong-lipong sa kalawasan, pamugtaw sa kanuoran sa kalawasan ug sakit sa rinyon kon pantog. Wala niya mapa-admit sa hospital kay apiki kaayo sa kuwarta.
Dugang pa niini, wala pa gyod siya kapalit og bugas alang sa konsumo nilang pamilya ug may bayranan pa gyod sila sa kuryente kon Veco.
Imbis malipay unta si Iko kay nakakobra na siya sa iyang pagka-senior citizen gikan sa city hall, kasakit ug kaguol na hinoon karon ang iyang gilukdo ug gibaaa kon ginaantos.
"Dimalas gyod siguro ang pagkasenior citizen ko da. Maayo pa’g midiretso ko sa pag-uli sa among balay," nagkanayon siya hilom ngadto sa iyang kaugalingon. Ultimo pamasahe padulong sa ilaha, wala na gyo’y diyot si Iko! (Kataposan)