Ang mekaniko sa kagabhion

Gula 1

Hapit na tungang gabii nga mipauli si Maning gikan nga naglingaw-lingaw sa Sanciangko’s Wildflower.

Mekaniko si Maning sa usa ka shop diha sa barangay Mabolo mao nga nabatasan na niya nga matag Sabado gantihan niya ang kaugalingon sa paglingaw-lingaw.

Taud-taud na siya nga suki sa Sanciangko’s Wildflower mao nga gihatagan na siya og prebiliheyo sa tag-iya nga si Wendell. Bisan ang floor manager ni Wendell nga si Ronnie nakaila na kaniya.

Katunga ra ang pabayran sa bayranan ni Maning mao nga nagbalik-balik g’yud siya sa Sanciangko’s Wildflower. Misamot ang kasuod ni Wendell ug Maning dihang giayo niya ang wala moandar nga kotse ni Wendell.

Samtang nagpadagan si Maning sa iyang motor didto sa South Road Properties (SRP) paingon sa ilang dapit sa Inayawan, nabanwagan sa suga sa iyang motor ang kotse nga nagparada daplin sa karsada.

Wala lang niya kini tagda sa pagtoo nga nagdeyt ra ang mga sakay niini, apan nakita niya ang kamot nga nagwara-wara nga miguho sa gibuksan nga bentana sa kotse.

Gibalikan ni Maning ang sakyanan nga diha daplin sa karsada. Nakita niya nga babaye ang sakay niini.

“Good evening, Sir pwede ba nga makapangayo’g tabang? Napagngan ko’s makina awaaw ra ba dinhing dapita,” matud sa babaye ngadto ni Maning.

Giparada ni Maning ang iyang motor ug gibuksan niya ang hood sa kotse. Nabatasan na ni Maning nga dili gayud mabuwangan og flashlight nga pirmi niyang ibutang sa U-box sa iyang motor.

Gitan-aw ni Maning ang suplay sa gasolina ug iyang nahibaw-an nga dili diay makasaka ang gasolina ngadto sa karburador tungod kay dunay buslot ang plastic hose.

“A dali ra ni Miss, wala lang makasaka ang gasolina,” matud ni Maning ngadto sa babaye. “Ay salamat g’yud Sir ha. Ako diay si Janice.”

Samtang nag-sumpay si Maning sa hose paingon sa karburador, mikalit pagbunok ang kusog nga uwan. “Manulod usa ta’s awto Ning kay mabasa ta.” Nagdali si Janice nga misulod sa awto. Gisirad-an usa ni Maning ang hood usa siya misulod aron dili kaayo mabasa sa uwan.”

Alimuot kaayo didto sa sulod tungod kay kun ilang buksan ang windshield, mosulod usab ang kusog kaayong uwan. “Sigurado ba g’yud nga mamaayo na nimo Ning?” pangutana ni Janice.

“Sigurado,” mubo nga tubag ni Maning. “Pila diay akong bayranan nimo sa pag-ayo,” sukna ni Janice. “Aw, walay problema, sugot ra gani ko’g kiss lang ang bayad.” (Sumpayan pa)