Buntag kadtong sayo. Wala pa mi mosulod sa klase. Wala pa gani mag-flag ceremony. Nanilhig pa kami sa palibot sa eskuylahan.
Nakugang na lang ko dihang nagkagubot ang mga bata dapit sa luyong bahin sa eskuylahan. Midali ko pagsusi. Maoy akong naabtan si Bernadith nga bangis kaayong nangawras ug nanumbag ngadto kang Paquito.
Nasayran ko nga gisungog diay ni Paquito si Bernadith. Managsilingan man gud kini sila. Ug sungogan kaayo kini si Paquito. Bugalbugalon kaayo mao nga kontra siya sa hapit tanang babaye nga among klasmet.
Ang gikasuk-an pag-ayo ni Bernadith kang Paquito mao nga nanabi ang naulahi ngadto sa among mga klasmet nga nadalaga na ang nahauna. Nga kuno, giregla na si Bernadith. Nakakita kuno siya (Paquito) nga naglaba si Bernadith og dinug-an nga underwear sa tubod. Tungod ba kaha sa kaulaw o sa unsang hinungdan, nasuko si Bernadith kang Paquito. Gidabo-dabohan lagi si Paquito. Maayo gani kay sa kadugayan nakahigayon si Paquito pagdagan ug nakalingkawas ra gyud siya sa kabangis ni Bernadith. Pero daghan na siya’g kinawrasan.
Samtang si Bernadith wala makapugong sa paghilak. Ambot kun tungod ba kaha sa kasuko ug kaulaw sa gipanabi ni Paquito maong wala siya makapugong sa pag-agas sa iyang mga luha.
Dihang nakahigayon ko, akong gipakigsultihan si Bernadith.
“Tinuod ba ang gipanugilon ni Paquito?” Gipangutana ko siya. “Nga unsa?” Gisumbalik ko niya’g pangutana.
“Nga nag-mens ka na.”
“Tinuod bitaw. Ngano man diay nga nangutana ka man?”
“Tinuod man diay. Nganong nasuko ka man ni Paquito nga wa man diay siya magtumo-tumo og estorya?
Wala motingog si Bernadith. Hait kaayo siya’g tinan-awan nako. -- Sumpayan pa