Gula 1
Misulod si Lorna sa chamber kon opisina ni Judge Hermes Ticman aron papirmahan ang giisyu niini nga Order sa usa ka kaso nga naglambigit og anak sa kapitan sa barangay nga gihusay sa huwes usa ka buntag niana.
Bag-o pa nga clerk si Lorna sa hukmanan diin si Judge Ticman mao ang presiding judge. Sa wala pa siya mosulod sa chamber sa huwes, nakadungog na siya og mga tabi-tabi sa pagka palakero ni Judge Ticman. Kini man gani maoy nagrekomendar g’yud kaniya aron si Lorna dili maglisud sa pagpangaplay didto sa Supreme Court.
“Pagbantay lang g’yud Day, kay basin makursonadahan ka ni Judge, gwapa ka ra ba,” nagngisi si Loren nga mipahimangno sa kauban niyang clerk dihang mipahibalo kini nga papirmahan niya ang dukomento sa huwes.
Bisan si Loren nakasinati na nga gibastos siya sa huwes sa makapila na ka higayon. Diha’y higayon nga misulod siya nga samtang nagpakli-pakli siya sa gipapirmahan niya ni Judge Ticman, gihikap ang iyang paa.
“Come in,” nadungog ni Lorna ang tingog ni Judge Ticman dihang nanuktok siya sa pultahan sa Chamber.
“Dali Lorn, ikaw man diay ang nanuktok. Unsa kanang imong gidala?” nangutana ang huwes.
“Kadto kining Order nga imong giisyu ganina Judge sa kaso sa anak ni Kapitan Bakil,” dali nga tubag sa clerk.
Giplastar ni Lorna sa lamesa atubangan sa huwes ang mga dukomento nga buot niya papirmahan. Diha siya nagtindog tupad g’yud sa huwes. Daw gikulbaan siya kay diha sa iyang huna-huna ang pasidaan kaniya ni Loren.
Tuod man, wala gayud masayop si Lorna. Samtang nagpadayon pagpirma ang huwes sa dukomento, ang wala niining kamot abtik usab nga mihapyod-hapyod sa sampot sa maanyag nga clerk.
Mikisi-kisi si Lorna dungan sa paglitok og mga pulong “Ayaw Judge, palihug respitahi ang akong pagka babaye.”
Mihunong tuod ang huwes sa paghapyod sa iyang sampot. Human sa pagpirma sa huwes, wala gayud kini makapugong sa pagpislit sa lamurok nga aping sa dalaga.
“Sus, pagkalami nga hagkan aning apinga uy,” nagpamahit sa kaugalingong ngabil si Judge Ticman. “Ato ra kadto ha Lorn, ayaw ipanabi,” matud sa huwes.
Paggawas ni Lorna, gisukna siya sa iyang mga kauban kun wala ba siya binuangi sa bilyako nga huwes. Nahukman ni Lorna nga bakakan ang iyang mga kauban.
Nabalaka siya nga kun iyang itug-an, basin og masuko kaniya si Judge Ticman ug ipataktak unya siya sa trabaho kay bag-o pa ra ba siya kaayo.
Mitingog ang “buzzer” nagpasabot nga may gipatawag ang huwes. Misulod ang secretary sa huwes, apan migawas lang usab dayon.
“Pasudlon ka ni Judge Lorn, pagdala kuno og bondpaper ug ballpen kay duna siya’y idektar,” matud sa secretary. (Sumpayan pa)