Gula 59
Iyang gilingi ang tag-iya sa maong tingog. Sa panabang sa dan-ag sa kahayag gikan sa daob, naklaro ni Ricky ang bayhon ni Ronald.
Sa makadiyot naghangpanay sila si Ricky ug Ronald Liwanag. Pagkahuman, nakigsulti na si Kumander Abay sa magsisibya nga igsuon ni Ronald.
“Gikasubo ko nga medyo dili komportable alang kanimo ang pagdala sa akong mga sakop nimo dinhi sa among kota,” nagkanayon si Kumander Abay. “Hinaot nga makasabot ka nganong gitaptapan namo ang imong mga mata. Naneguro lang mi.”
“Nakasabot ko,” matud ni Ricky. “Nganong gipa-pick up ko nimo sa imong mga sakop aron dad-on dinhi?”
“Tungod sa duha ka katarongan,” sa Kumander pa. “Una, gusto namong imong makita ang among kahimtang dinhi sa bukid. Ikaduha, gusto namong masayod ka nga nakauyon kami sa imong baroganan isip usa ka magsisibya. Ang sama kanimo maoy among gikinahanglan. Dako ka’g ikatabang sa among kawsa.”
“Unsay buot mong ipasabot?” Gikati og pangutana ni Ricky ang Kumander.
Wala na magliko-liko pa ang kumander sa tuyo niini kang Ricky. Gipadayag niini kaniya ang tinguha niini nga mamahimo siyang sakop sa pundok nga gipangulohan niini. Apan mibalibad si Ricky sa paagi nga dili ikasilo sa Kumander. -- Sumpayan pa