Gula 8
Nasayod si Judge Bart nga naputol na ang iyang mga binipisyo gikan ni Mr. Sing karon nga gipakanaug niya ang hukom nga wala mopabor kaniya.
Tag P50,000 ang retainer fee ni Bart gikan ni Mr. Sing isip bugti sa pagtabang niya kun ang kompaniya sa Insik dunay mga kaso nga masang-at diha sa korte. Gawas sa maong dakung kantidad nga madawat ni Bart matag buwan, libre pa g’yud siya sa tanang bayranan kun moadto siya sa mga hotel nga iya ni Mr. Sing.
Kini maoy rason nga naglainlain lang nga mga babaye ang gipangdala ni Bart sa hotel ni Mr. Sing diha sa Guadalupe.
Gihasol g’yud ang kaisipan ni Bart. Gikontak niya si Gina. “Aria ko sa balay karon dayon kay ari na lang kita mag-deyt,” giteksan ni Bart si Gina.
Taud-taud, mibawos si Gina og miingon nga dili siya makaadto kay naglain ang iyang lawas kay dul-an na diay sa duha ka buwan nga wala na siya tungaha sa binuwan niyang sakit.
“Nahadlok ko Bart nga basin mimabdos ko,” matud ni Gina. “Unsa! Unya ako ba ang imong paangkunon?” dali kaayo nga nakabawos si Bart.
Gi-off dayon ni Bart ang iyang cellphone. Gikan niadto, gilikayan na ni Bart si Gina. Sa korte, adto na agi si Bart sa sekretong exit aron sibatan si Gina nga usahay magpaabot kaniya sa main door.
Usa ka adlaw niana, natinuod g’yud nga gikiha si Bart ni Mr. Sing didto sa Manila. Ang kaso mao nga nagdawatan siya og binuwan nga bayad gikan sa Insik, ug libre pa nga gamit sa hotel.
Naproblema kaayo si Bart. Mikiring ang iyang cellphone ug si Mr. Sing ang mitawag. “Nasayud ko nga nakadawat ka na sa kopya sa akong kiha nimo, iprobar nga wala kay sala kay ipresentar nako ang akong mga ebidensya.”
Gitubag ni Bart ang kaso. Ang iyang rason mao nga pulos tumo-tumo ug walay basihanan ang pasangil ug gitumong ra aron dauton ang iyang pagkatawo.
Gipresentar niya ang disisyon sa kaso nga giingong maoy nasuk-an ni Mr. Sing.
Apan ingon sa wala kaayo makontinto ang Court Administrator nga maoy unang miimbistigar sa kaso.
Gimandoan si Bart nga motunga sa adlaw sa imbistigasyon ug mahimo siya nga makadala og saksi.
Pag-abot ni Bart sa iyang sala usa ka buntag niana, dunay mitunol kaniya og suwat. Giablihan niya ug nakurat siya kay gikan ni Mr. Sing.
“Mas makurat ka Bart kun makita mo na ang akong star witness ug ang nagtipun-og ko nga mga ebidensya nga maoy makapataktak kanimo pagka huwes.” – (Taposon sunod gula)