Gula 2
Nagduha-duha pagtangdo si Gina sa pagdapit ni Judge Bart nga manuroy sila nianang gabhiona. Nakabantay siya nga mora’g lain og tuyo kaniya ang huwes isip bugti sa paghatag kanila og paborable nga hukom sa kaso sa ilang yuta.
Apan alang hinoon ni Gina, dili na dakung isyu kaniya ang iyang pagkababaye kay naangkon na kini sa kanhi niya hinigugma kaniadto. Suod na usab kaniya si Bart kay bisan managkalagyo ang ilang pangedaron, apan wala kini makapakgang sa ilang panaghigala.
“Sige Bart, kontaka lang ko unyang gabii,” dayong biya ni Gina sa Chamber (opisina) sa huwes.
Naghinam-hinam si Bart nga matilawan na g’yud niya ang dugam-is sa pagka babaye ni Gina. Mga tulo ka buwan na nga sila nagkaila apan gihuwat ra g’yud ni Bart ang higayon nga dili makabalibad kaniya si Gina.
Nahuna-huna ni Gina nga kun iyang balibaran ang tinguha ni Bart nga makig-deyt, posible nga usbon niini ang hukom ug dili sila makaangkon og paborable nga hukom sa ilang kaso.
Alas siete sa gabii, gipik-ap ni Bart si Gina didto sa downtown area. “Asa kita karon Bart?,” gisukna ni Gina ang huwes dihang misugod na pagdagan ang sakyanan paingon sa uptown.
“Adto kita sa usa ka hotel sa Guadalupe, dunay nindot nga pasundayag karon. Mga artista gikan sa Manila ang mopasundayag,” abtik nga tubag sa huwes.
Didto sa hotel, nabantayan ni Gina nga tinagad kaayo ang huwes. Dili mahutdan ang ilang lamesa og mga pagkaon ug mainom. Mopirma lang si Bart sa matag niya order.
“Wala ko’y bayad-bayad bisan unsay akong orderon dinhi Gin. Bisan sa mga room sa hotel kun mogamit ko libre sab,” nanghambog si Bart kang Gina.
Pagsugod na sa show, nakurat si Gina kay ang pasundayag diay nga ilang tan-awon ug sa huwes mga babaye nga maghubo sa ilang sapot atubangan sa mga customers.
Bisan og 21-anyos na si Gina apan karon pa siya makatan-aw og ingon niini nga pasundayag.
Nabantayan ni Gina nga mihinay-hinay pagbai-id kaniya si Bart. Giagbay sa huwes ang iyang bukton sa abaga sa dalaga.
Human mahurot ni Gina ang duha ka botelya nga beer, daw nalipong siya. Nanginit ang iyang kalawasan. Gipadugangan ni Bart og usa ka botelya ang order para ni Gina. “Ayaw kabalaka Gin, anhi ra kita mamahuway sa hotel. Walay problema kay higala nako ang tag-iya niining maong hotel,” matud sa huwes.
Wala na motingog pa si Gina. Human sa pasundayag, gitawag ni Bart ang usa ka waiter ug dunay gihunghong.
Taud-taud, mibalik ang waiter ug mitunol og yawe sa huwes. “Tana Gin, adto na kita sa atong kwarto.” (Sumpayan pa)