Gula 49
Aron pagtino sa iyang katahap, nakigkita dayon si Teresa sa usa ka doctor. Tuod man, wala gayod siya masayop. Nasuta sa doctor nga naghiling kaniya nga nagsabak siya. Nahugno si Teresa sa maong kasayoran. Sa higayon nga masayran sa iyang mga ginikanan ang iyang kahimtang, seguradong pahunongon gayod siya sa pag-eskuyla.
Apan sa laing bahin, nalipay sab si Teresa. May liwat na sila si Ronald. Ang bata nga miturok sa iyang tagoangkan bunga sa ilang gugma. Wala niya basoli ang pagtahan sa iyang kaugalingon ngadto kang Ronald kay gihigugma man kini niya.
Nakahukom si Teresa nga tug-anan niya ang iyang mga ginikanan sa iyang kahimtang.
Nianang pagka-Sabado, mipauli si Teresa sa ilang dapit. Ingon sa nahan-ay na niyang daan ang tanan niyang igsusulti ngadto sa iyang mga ginikanan. Mao nga pagkahuman sa ilang panihapon, gisultihan na niya ang iyang mga ginikanan mahitungod sa iyang kahimtang -- nga nagsabak siya ug si Ronald ang amahan niini.
Nareyalisar man gud ni Teresa nga walay kapuslanan kun tagoon pa niya ngadto sa iyang mga ginikanan ang matuod niyang kahimtang. Sa madugay o sa madali, modako gyud ang iyang tiyan ug mabisto gihapon nila ang kamatuoran. Mao nga karon pa lang iya nang ibutyag ang kamatuoran ngadto kanila. -- Sumpayan pa