Taudtaod nang nagdagan ang motorsiklo ni Ricky dihang nakamatikod siya nga may suga sa sakyanan nga nagsunod sa iyang luyo. Kalit lang kaayo sa siyang gikulbaan. Sa iyang premonition, mora’g siya’y tuyo sa mga nagsakay sa sakyanan nga nagsunod kaniya. Nangandam dayon si Ricky sa iyang kaugalingon.
Gipakusgan ni Ricky pagpadagan ang gisakyanan niyang motorsiklo. Mipakusog usab ang sakyanan nga nagsunod kaniya.
Gipakusgan pa gyud ni Ricky ang pagpadagan sa motorsiko nga iyang gisakayan. Pag-abot niya sa usa ka eskina, miliko siya. Pagsil-ip pa niya sa side mirror sa motorsiklo, nakita niya ang kahayag sa headlight sa sakyanan nga miliko ug misubay usab sa dalan nga iyang gisubay.
Natino ni Ricky nga siya gayod ang tuyo sa mga nagsakay sa maong sakyanan. Posibleng daotan sila’g tuyo kaniya. Taudtaod nang may hulga ang iyang kinabuhi tungod sa walay kukahadlok niyang pagpangatake sa mga politiko nga nakahimog anomaliya. Ug tingali, ang mga sakay sa sakyanan nga nagsunod kaniya karon mga sinugo sa usa sa mga politiko nga iyang naatakehan sa iyang tulomanon nga “Husgador” sa estasyon DyTM ug sa iyang lindog nga ‘Bistador’ sa Bohol Tribune. - Sumpayan pa