Bay, suod man gyud mo si Marian, ipalihog na lang ko og hatag ini bi, matud ni Frank kang Rolly. "Unsa man ni Bay?" "Sulat ni Bay, akong gipanguyaban si Marian." "Bi, ambi na," ni Rolly nga wala makabalibad sa hangyo sa higala, apan sa sulod sa iyang hunahuna, kabalibaron siya sanglit may gusto usab siya kang Marian. 'Naghalhal man lang ko, naunhan na hinuon ko's kagwang.'
Milabay ang pila ka adlaw. "Nahatag nimo kang Marian ang akong sulat, Bay?"
"Oo, akong gihatag."
"Unya, unsa may sulti?"
"Wa man to motingog, nag-mud-ok man lang to."
"Nia pay usa, Bay, palihog lang ko og hatag niini ug sultihi siya nga mamisita ko."
Akong gidawat ang sulat ug nianang pagka-gabii, "Mar, niay sulat para nimo gikan sa akong higala," dayon kong tunol sa sulat.
"Ngano ka man Rolly nga imo man nang dad-on ang sulat sa lain nga wa man koy gusto nianang tawhana."
"Unya, unsaon ko man lang ni kun di mo dawaton?"
"Kun di mo na iuli sa tag-iya, usapa na," matud ni Marian na napikal. "Nganong ang sulat sa laing tawo mao man hinuon ang imong seguroon samtang ang imo, wa pa gani nimo ikahatag."
"Unsaon nako paghatag nga wa man koy sulat?"
"Tan-awa ra nang katarungana -- kun wa kay ikahatag, ngano man nga di ka man maghimo?"
"Tinuod ka, Marian?" daw dili makatuo ang ulitawo.
"Ambot nimo Rolando, kay dako ka naman, mangutana ka pa gyud nako."
Milingilingi una si Rolly kun wa bay lain nga nagtan-aw, dayong gunit niini sa kamot sa dalaga ug namulong. "May gusto ka sab diay nako, Mar?"
"Unsa may gusto nimo -- ako pay mangulitawo nimo?" mitindog ang dalaga aron mopahawa sa atubangan ni Rolly. Gipugngan dayon kini sa ulitawo.
"Marian, mahal ko ikaw,"nakabungat ra gyud ang ulitawo. "Pasayloa ko sa akong pagka-burong. Mahimo ba nga makahalok ako?"
"Unsa pa may imong gipaabot, pasko, kay sa Disyembre pato?"
Gigakos dayon ni Rolly ang dalaga ug gihagkan ang naghulat nga mga ngabil niini. (Katapusan)