Silot sa pagluib

Dihang nagkadikit ang ilang lawas ni Rommel ug Rowena sa wala pa sila mikanta, maoy misugat sa panimhot sa lalaki ang nangalimyon nga pahumot sa babaye.

Nagustohan ni Rommel ang perfume nga gigamit ni Rowena mao nga gipasagdan lang niya ang babaye nga midikit pag-ayo kaniya. Wala usab magmahay si Rommel kay maayo man diay usab mokanta si Rowena.

Mipagakpak god ang ubang customers human sa pagkanta nila sa Bakit Ngayon Ka Lang. Gisundan pa g’yod nila pagkanta sa duet nga Endless Love nga sikat kaayo nga kanta ni Lionel Ritchie ug Diana Ross.

Human nila’g kanta sa Endless Love, gitungab ni Rommel ang beer. Dayon gitutokan niya si Rowena ug giingnan “Tukma kaayo ang una natong gikanta Wen, kay nganong karon ra man kita magkita nga minyo ka na.”

Mipahiyom si Rowena apan taud-taud miingon “Ngano man diay god, dili na ba diay maantigong mahigugma ang usa ka minyo?”

Daw sa nakalitan ug wala makatoo si Rommel sa nadungog niya gikan ni Rowena. Nanganta pa sila’g usab sa mga awit Please Be Careful with my Heart ni Jose Mari Chan.

Tungod sa kamaayo nila nanganta, wala god makapugong ang tag-iya sa Sanciangko’s Wildflower nga si Boss Wendel nga migawas sa iyang opisina ug gilamano ang duha.

Taud-taud nanggawas sila si Rowena ug Rommel sa videokehan. Ginuntan sila pagtan-aw sa mga masinahong mga mata sa ubang customer. Klaro kaayo nga nasuya sila kang Rommel kay nabihag niini ang kasing-kasing sa maanyag nga si Rowena.

“Kanus-a mopauli dinhi ang imong bana Wen gikan sa Saudi,” gipangutana ni Rommel ang babaye samtang nagdagan ang ilang gisakyan. “Ambot adto niya uy, mga duha ka tuig na nga wala mopauli, unya karon panagsa na lang mokontak,” tubag usab ni Rowena.

“Aw asa tika i-drop Wen? Nagdali ka ba?,” gisukna ni Rommel si Rowena. “Adto ta sa balay manihapon Rommel, lutoan ko ikaw og lami nga pagkaon isip pagselebrar sa atong panagkaila.”

Igo-igo ra ang gidak-on sa balay nilang Rowena. Gibuksan ni Rowena ang pultahan kay wala man diay siya’y katabang. Siya ra ug ang iyang igsoon ang nagpuyo apan miuli kini sa probinsya human sa klase mao nga siya na lang usa sa balay.

Gilutoan ni Rowena og lamiang pagkaon si Rommel. Human sa ilang pagpangaon, samtang naglingkod si Rommel sa sopa, miduol kaniya si Rowena ug mitupad paglingkod.

Ang babaye pa maoy miuna sa paghapuhap sa paa ni Rommel nga abtik nga nakasabot kun unsay tuyo ni Rowena niining higayona. (Sumpayan pa)