Manyakisss..! bastosss....!" singgaak ni Irene dayong saliyab sa usa ka kabong tubig ngadto sa lungag sa banyo nga iyang gikaligoan. May namuso sa iyang pagkaligo ning buntaga. Unang adlaw pa lang gani sa iyang pagpuyo ning iya rong gi-abangan, apan gilihian dayon siya'g lili sa iyang pagkaligo. Nagyawyaw’g nigawas ang dalaga sa banyo nga wa katiwas og kaligo.
Nagpangurog siya dili sa ka bugnaw sa tubig, kun dili sa kalagot ug ka-uwaw sa iyang gibati, kay tibuok hubong lawas gyud niya ang nakita sa maong mamusohay. Naka-deside unta siyang dili modayon og puyo, apan naka-abang na siya og usa ka buwan. Pagkahapon gikan nauli sa iyang trabaho, nagpakisayod dayon siya sa tag-iya sa iyang giabangan nga si Nang Tanya, nga anaa ra usab nagpuyo sa ibabaw'ng bahin sa maong paabangan nga mga kwarto. Dos andanas ang maong balay. Ang ubos, may walo ka kwarto nga maoy gipa-abangan, samtang ang ibabaw maoy gipuy-an sa tag-iya. Wa lang usa niya sultihi si Nang Tanya sa nahitabo niya kaganinang buntag sa iyang pagkaligo. Nagpakisayod lang siya kun kinsa ang nanggi-abang sa kasikbit niyang mga kwarto. Maoy iyang pagtuo nga ka-boardmate lang niya ang namuso ug gusto niya kining ilhon aron naw'ngon niya'g kasaba. Human nila’g istorya ni Nang Tanya, nag-alibay dayon siya'g panumbay sa iyang mga ka-boardmate. Lima ra ka kwarto ang may nag-abang. Ang tulo na bakanti, kay namalhin ang tulo nga nag-ukopar nga pulos mga dalaga. Ang upat ka kwarto, puro lalaki ang nag-abang.
Siya lang diay babaye ang nasagol. Apan pakyas si Irene sa pag-ila sa maong mamusohay. Kay human niya makaila ang mga lalaki nga iyang ka-boardmate, wa man natakdo sa suspetsado ang ilhanan nga di niya makalimtan. Ang kadak-on sa mga mata. Ordinaryo lang ang pang-mata sa iyang mga ka boardmate samtang kadtong namuso niya askang dakoa. Di gyud siya puweding masayop kay dako ang buslot sa bongbong sa banyo, ug naklaro niya ang namudlot nga mga mata nga nagtutok kaniya. Pagkabuntag, tingkaligo na usab niya. Sulod sa banyo nagkibutkibot ang iyang baba nga naghangad sa maong buslot. "Ngano man sang wa man tapaki'g flywood nis' tag-iya oy? Kinsa kaha tong namuso no? Dako ra ba kaayo'g mata" yawyaw sa dalaga dayong palong sa suga aron di siya maklaro sa iyang pagkaligo kun ugaling busohon man siya pag-usab. Nisugod na siya'g pamubo sa hubo niyang lawas. Dayon gisundan sa pagpanabon. Apan sa iyang paghiyangad, maoy nisugat na usab sa iyang panan-aw ang sigang mata nga nanglili. Klaro kaayo ang dakong mata kay hayag man ang gawas samtang ang sulod arang ngi-oba. Wa naglangan ang dalaga, iya dayon kining gisaliyaban sa giandam niyang ihi nga gisulod sa arinola. '';ayaayyyy...! kahapdos...!" syagit sa maong tawo nga naglagubo gawas sa banyo. Grabing naka-agik-ik ni Irene sa sulod. "he...! he..! he..! da.. usab pa kang bastosa ka!" Paggawas niya sa banyo, tayming nga nanilhig si Nang Tanya sa nataran. Iya dayon kining gipangutana. "Nang, may pangutana unta ko Nang?" "unsa man day?" sukna ni Nang Tanya nga padayong nanilhig," may nagpuyo ba diri Nang nga dako og mata?" diritso-diritsong pakisayod sa dalaga. "Kay ngano man day?" ni Nang Tanya nga daling nituyhakaw nga morag nakuratan sa maong pangutana. "Ku-an man gud Nang, kada-ligo nako, may mamuso man gud nga dakoon og mata" ni Irene nga naghangos pagsulti ngadto kang Nang Tanya. Tayming nga may edaran nga laki nga nikanaog gikan sa balay ni Nang Tanya.
Nanghilam-os kini sa nawong nga mora'g gi-katlan. Paghiyangad sa maong tawo nakita kini ni Irene ang mata nga arang dakoa. "Ingon anang mataha nang ba...! ingon ana kadako..!" ni Irene nga matinud-anong nitudlo sa tawo nga nikanaog sa ilang Nang Tanya. "dahhh..! daan pa lagi kong tawhana ka! Nibalik nasad ka sa imong bisyo, manyakisa ka!" ni Nang Tanya dayong lapdos sa silhig ngadto sa tawo.
"Banang way buot! imong boarder imong busohon, bastos! Sayrang wa nay babaye nga molahutay og puyo sa atoa kay imo mang busohon manyakisa ka...!" ni Nang Tanya nga ni dabodabo og kasaba sa iyang bana. Morag natiurok si Irene sa iyang nasayran. Wa siya nagdahom nga ang mamuso diay niya nga dako'g mata, bana diay ni Nang Tanya. Unsaon karon pa man siya nakakita sa bana ni Nang Tanya, nga dako'g mata. (Kataposan)