Gula 26
“Nalipay sab ko niining maong kalamboan,” matud ni Lonia. “Wala ko magdahom nga ingon niini ang acceptance sa mga magbabasa sa akong mga nobela.”
“Mao nga dugangi ang imong paningkamot,” ni Rev pa. “Paninguhaa nga mas monindot pa gayod ang sunod mong mga nobela aron dili ma-disappoint ang imong mga magbabasa.”
“Paninguhaon ko kutob sa akong mahimo.”
“Kinahanglan gyud nga imo kanang buhaton. Ang mga magbabasa ra ba dali rang motagam. Once nga makabasa sila’g sinulat sa usa ka awtor nga wala sila makauyon, dili na sila mopalit sa ubang sinulat sa maong awtor. Mao nga kinahanglang mamintinar nimo ang quality sa imong mga sinulat.”
Gumikan sa dakong kalamposan nga naangkon sa nahaunang mga sinulat nga pocketbook ni Lonia, nadasig siya nga mas panindoton pa gayod ang sunod nga mga nobela nga iyang gisulat.
Misamot pa gayod ang iyang kadasig sa pagpanulat sa dihang iyang nadiskubrehan sa iyang kaugalingon nga hilom siyang nakagusto sa iyang editor, si Rev Florentino.
Apan gipaningkamotan niyang dili makasabot si Rev sa iyang gibati. Anad na siya sa pagtago sa ingon niining matang sa sekreto. Kaniadto gani, naminyo na lang si Alex apan wala gayod kini makamatikod nga nakagusto siya niini. Maantigo man gud siyang mokontrol sa iyang kaugalingon. -- Sumpayan pa