Gula 91
Gipangilogan na hinuon karon si Destiny nga naghunahuna sa gibuhat nila ni Evan -- sa tinguha nilang pagpakamatay. Pagka-dako gyud diay’ng sayop sa ilang gihimo. Natugkad na karon ni Destiny kun nganong nakaingon si Mrs. Galasi nga dili dako ang giatubang nilang problema ug dili kini angay hikogan. Kaanugon sa ilang kinabuhi kun namatay gayod sila sa ilang paglaslas sa ilang pulso. Dili unta sila makakita sa liwat nila ni Evan.
“Busa ikaw, Evan,” ni Mr. Galasi pa nga mipagahi sa tingog “Kinahanglang bangonon mo ang dungog sa akong anak, ha.”
“Y-yes, Sir,” ni Evan. “A-aw, Dad diay...”
Ingon sa kalit lang nausab ang dagan sa kinabuhi ni Destiny human niya masayri nga dili sila matuod nga managsuon si Evan. Hapsay ug tawhay na ang iyang pamatyag sa iyang kaugalingon.
Gitakda na ang adlaw sa ilang kasal. Si Mr. Galasi maoy nagbuot kun kanus-a sila magpakasal. Gusto sa magtiayong Galasi nga mabendisyonan na sila sa pari samtang dili pa kaayo mabisto ang pagbusyad sa tiyan ni Destiny.
Daw maglisod si Destiny pagtuo sa nahitabo sa iyang kinabuhi. Nagtuo siya nga sa mga pelikula lang kini mahitabo. Apan nahitabo kini sa tinuod niyang kinabuhi. Sa kinabuhi nila ni Evan. -- Sumpayan pa