CEBU, Philippines - Upat pa lang gani ka buwan, sukad namatay si anhing Goyong, nga natunok sa kagingking nga gititanus, samtang nagpalunang kini sa iyang kabaw, aduna nay nadiparahan si Eser, nga may modagayday nga kabasa sa iyang bilahan, matag abot sa kaadlawon. "Dili na maayong sinyales sa imo karong sakit nga mitakboy kanimo Eser?" ni Nanay pa niya Noring nga giabot og dili tiaw nga kabalaka.
"Basin bus-aw ni Nay Noring, kay hapit kada minutos motil-is man ako sa pagpangihi?" mabalak-on ang tuno sa pangutana niya ngadto sa iyang inahan nga taudtaod na usab nabiyuda.
"Ambot lang sad kaha Eser?" mubong tubag ni Nanay niya Noring.
Dili ikalimod ... nga sulod pa lang sa siyam ka bulan sukad nagtipon ang magtiayon, ning ilang balangay sa Kiwkiw, nga sakop ning ilang lungsod sa San Fernando.
Maoy kanunay mahinumdom ni Eser, nga matag udto mouli gayod si Goyong, gikan nga magdaro, modigamo kaniya, sulod sa ilang sibay ug nagkanayon:
"Diliiiii maayonggggg ... usikannnnn ..... taaa .... anggg panahonnnnn... Eserrrrr .... samtang aniaaaaa paaaa ... kanatonggggg duhaaa ang kaganaaaaaa .... aronnnnn makabatonnnn .... dayonnnn kitaaa ugggg liwattttt!"
"Klaro kaayo ug dili malalis nga ang pinitik sa imong pulso, ikaw gibuyagan sa dili ingon nato samtang mag-inusara ka nga maligo sa may sapa sa Kiwkiw!" kalit lang nahagtos ang kahalawom nga pinanawan sa paghanduraw ni Eser gikan sa hingawhaw ni Ingko Bartolo nga giilang maayong manunutho og buyag sa dili ingon nato.
"Unsa may angay kong buhaton Ingko Bartolo, aron maayo kining akong sakit nga pag-ihi-ihi?' ni Eser pa nga mabalak-on.
"Aron dili masuhong ang akong orasyon ... maayo nang makatulog ka una, samtang sugdan ko pagpangyamyam ang linatin kong pulong nga makaayo sa buyag sa dili ingon nato!" pintok nga namulong si Ingko Bartolo.
Mao na lamang ang namat-an ni Eser nga sa iya nang pagmata hilabihan pagpanghapdos ang ubos sa iyang bilahan ug matud pa ni Ingko Bartolom, nga may sagol bus-aw sa kahidlaw ang iyang kanunay nga pag-ihi-ihi. (Kataposan)