Gula 88
“Ngano gong di? Anak gud nako kanang bataa. Nagkapakong-pakong ko sa paghimo niana.”
“Buing...”
Human sa panihapon, gipatawag sila si Destiny ug Evan sa ilang amahan. Sa sala, nag-atubang silang upat. Mitupad sa paglingkod kang Mr. Sebastian Galasi si Mrs. Virginie Galasi. Si Destiny mitupad kang Evan. Wala sila’y timik.
“Gipatawag ko kamo aron masabotan ang bahin kaninyo,” nagkanayon si Mr. Galasi. “Kinahanglang sulbaron nato kining problemaha sa labing daling panahon.”
Wala motingog si Destiny. Mipasiplat siya kang Evan nga nagduko. Iya kining gisikdo hinungdan nga mipasiplat usab kini kaniya.
“Kun mitug-an pa kamo dayon kanamo sa nahitabo,” ni Mr. Galasi pa. “Dili unta mosangko sa ingon niini kining problemaha. Ang nakadaot ninyo kay inyong gitago kanamo ang inyong suliran.”
“Mao kana,” dason ni Mrs. Galasi. “Ug tungod sa inyong tinguha paglilong sa kamatuoran nakahunahuna na hinuon kamo’g daotan. Kun simbako milampos gyud kamo sa inyong paghikog, kinsa may naalkanse? Di ba kamo ra usab?”
Wala magtingog sila si Destiny ug Evan. Wala gayod sila masayop sa ilang pangagpas nga makadawat sila’g sermon gikan sa ilang mga ginikanan. -- Sumpayan pa