Gula 86
Mao kini ang lintunganay sa kalibog ni Destiny. Wala gayod siya makatugkad sa lohika sa sinultihan sa iyang mommy.
“Sa pagkakaron,” matud ni Mrs. Galasi. “Ayaw una paghunahuna og bisan unsa. Maoy hunahunaa kanunay ang dali mong kaayohan. Okey?”
Wala motingog si Destiny. Igo ra niyang giyango ang iyang pagsanong.
Unya gihagkan ni Mrs. Galasi ang iyang aping.
Dihang nakagawas na sila si Destiny ug Evan sa tambalanan, gikuyog sila sa ilang mga ginikanan pauli ngadto sa Pinamungajan. Wala pa tangtanga ang bendahe sa samad sa ilang mga pulso apan baskog na sila.
Paghiabot nila sa Pinamungajan, gibati nila ang kalapoy sa biyahe. Gihatagan una sila’g higayon sa ilang mga ginikanan nga makapahulay. Apan gipasidan-an sila sa ilang daddy nga human sa panihapon, magsultihanay silang upat kay may mahinungdanon silang panagsabotan.
Sulod sa iyang lawak wala mahimutang si Destiny. Nahasol ang iyang hunahuna. Unsa man kaha ang pakigsabotan sa ilang mga ginikanan ngadto kanila ni Evan? Unsa man kaha diay ang plano sa ilang mga ginikanan mahitungod sa ilang kahimtang?
Dili lang kay si Destiny ray nahasol, lakip diay usab si Evan. Misulod ang ulitawo sa iyang lawak aron makigsulti kaniya. -- Sumpayan pa