Unya miturok ang iyang kabalaka dihang mitumaw ang daotang pangagpas sa iyang hunahuna. Patay na kaha si Evan? Namatay gayod kaha ang iyang maguwang gumikan sa paglaslas sa pulso niini hinungdan nga siya ray nadala sa tambalanan ug naluwas?
Naputol ang paghanduraw ni Destiny dihang naabli ang pultahan sa lawak nga iyang nahimutangan. Unya nabati niya ang hinagtok sa mga tunob nga nagpaingon sa iyang gihigdaan. Nakugang siya dihang iya kining nakita.
“Kumosta ka na?” Tugob sa kahingawa ang pangutana ni Mrs. Virginie Galasi samtang nagbarog sa tungod sa gihigdaan ni Destiny.
“M-mommy...” mao ray nalitok ni Destiny.
“Maayo kay naulian ka na sa panimuot,” sa inahan pa. “Si Nang Nema maoy nakabangal ninyong duha ni Evan. Nakaplagan mo niya sulod sa imong lawak nga pulos naglunang sa dugo, wala nay panimuot ug may samad ang pulso. Nagpatabang siya aron madala kamo dinhi sa tambalanan ug gipahibalo dayon mi niya sa nahitabo.”
Wala motingog si Destiny. Ingon sa wala siya malipay sa gitaho sa iyang inahan kaniya. Kay alang kaniya, mas maayo pa lang unta kadto'g gipasagdan na lang siyang mamatay aron matapos na ang iyang suliran. -- Sumpayan pa