Mosulod na unta ko sa banyo aron maligo. Apan gipugngan sa akong apuhan nga si Lolo Edot kay siya kunoy mouna. Gani, nagsalib-ay na siya'g tualya ug nagdala usab og sabong pangkaligo, hasta shampoo. Natingala kaayo ko kun unsay nasulod sa ulo ni Lolo Edot, nga maligo man siya nianang orasa sa kahapunon. Sama sa akong nahunahunaang pagabuhaton. Talagsa ra man unta siyang maligo. Maayo nalang gani og makaligo siya'g kausa sa usa ka semana. Dili man gani ni usahay manghilam-os.
Taudtaod gyud kong nagpaabot kun kanus-a mahuman og kaligo si Lolo Edot. Sa hunahuna pa nako nga tingalig ang nadugayan niini mao ang pagpanglugod. Kay nagkapal na tingali ang mga buling niini. Kay talagsa ra man god kining maligo.
Sa dihang migawas na si Lolo Edot sa banyo mipuli dayon ko. Samtang nanabon ko sa tibuok kong lawas nagsige sab ko og hunahuna kun unsa gyud kahay hinungdan nga naligo man ang akong apuhan niadtong higayona.
Natubag lang dayon ang akong pangutana sa dihang nadungog nako ang tingog sa usa ka sound system. Nga didto magagikan sa plasa sa among barangay. Nahinumdom dayon ko nga duna diay ipahigayong kalingawan nianang pagkagabii. Kay Senior Citizens Night man.
Pagkahuman namo og panihapon namatngunan nako nga nag-ilis na si Lolo Edot. Maoy iyang gisul-ob ang puti niyang polo nga tag-as og mga bukton. Giparesan kini niya sa labyog niyang karsones nga itom ug panit usab nga sapatos. Nga itom usab og kolor.
Sa didto nako sa plasa, akong nakita nga daghan na kaayong mga tawo nga nanglingkod sa senementong lingkuranan. Kadaghanan hinuon kanila may mga pangidaron na. Kay ila god kadtong gabii sa mga sakop sa Senior Citizens.
Kadaghanan gyud sa gipanokar pulospulos gyud mga karaan. Ug naglabi ang sonatang Waltz. Diha pa gani gipatokar nga kuratsa ug Alkampor. Hinuon, pagasal-otan sab kini'g mga modernong sonata kay diha man lagi mga batan-on nga mitambong.
Sa dihang gipatokar ang usa ka sonatang Cha-cha, kalit lang nahasiga ang akong mata. Nakit-an ko man god si Lolo Edot nga misayaw. Ug batan-on pa gani kaayo ang iyang gikapares sa pagsayaw.
Human sa Cha-cha, gipatokar na usab ang sonatang Tango. Ug misayaw gihapon si Lolo Edot. Mao gihapoy iyang gikapares kadtong batan-ong babaye nga maayo usab kaayong mosayaw. Ug gipakpakan gihapon sila.
Sa akong hunahuna, makamao gayud diay si Lolo Edot sa nagkalainlaing mga sayaw. Mahilig diay kaayo ang akong apuhan sa ballroom dancing. Kay bisan sa Rhumba, Mambo ug samba maayo gihapon siyang misayaw.
Bisan naglakaw nako paingon sa among balay mao lang gihapoy akong gihunahuna ang gipakitang abilidad ni Lolo Edot bahin sa pagsayaw. Wala man god ko magdahom nga maayo diay kaayo siya niini. Kadto pa man god ko makakita kaniya nga misayaw sa maong matang sa sayaw.
Paghiagi nako sa may payagpayag nga diha mahimutang sa daplin sa dalan maoy akong nasigpatan si Lolo Edot nga may gikasulting usa ka babaye. Hinuon wala ko dayon maklaro kun si kinsa ang maong babaye. Si Lolo Edot ra gayud maoy akong nailhan, sa sinugdanan.
Tungod sa akong pagkakuryuso, gipanup-an ko silang duha samtang nagsultihanay diha sa maong payagpayag. Ug mao gayu'y akong nakita ang akong apuhan nga nagsabak sa usa ka batan-ong babaye.
Daw dili ko makatuo sa akong nakita kay ang babaye diay nga gisabak sa akong apuhan mao man kadtong batan-ong babaye nga kanunay niyang gikapares sa pagsayaw didto sa plasa.
Igo lang akong nakapanglingulingo. Ug sa hilom nakaingon ako. "Bilyako diay kaayo kining akong apuhan. Makamao pa man diay kining motusik." (Kataposan)