Udto nang nahigmata si Olivero. Kagabii god mitambong siya sa birthday party sa usa niya ka higala. Bongga ang ilang inom mao nga nahubog siya. Kaadlawon na siyang nahiuli sa ilang pinuy-anan. Mibangon siya ug migawas sa kuwarto. Nagmingaw ang balay. Wala na si Mariette, iyang anak. Nakagikan na kini paingon sa unibersidad nga gitunghaan niini diin mikuha kini sa kurso nga komersiyo.
Nakahinuktok siya. Milakaw lang si Mariette nga wala mangayo og kuwarta kaniya alang sa allowance niini. Pipila na ka adlaw nga nahitabo kini. Misantop sa iyang hunahuna nakatigom tingali og kuwarta si Mariette gikan sa allowance nga iyang gihatag ngadto niini sa miaging mga adlaw. Nakasobra tingali, niya pa.
Biyudo na si Olivero. Namatay ang iyang asawa sa konsimisyon tungod sa iyang pagka bisyoso. Himabaye siya nga walay ikaduha. Ang iyang kinitaan sa pagpanarbaho sa usa ka pabrika igo rang igasto sa babaye.
Bentaha na gani karon nga nagtungha na si Mariette sa kolehiyo kay gimenosmenosan na niya ang pagwaldas sa iyang kuwarta. Apan ang bisyo niya sa babaye wala gayod niya talikdi. Sa laktod, nagpabilin siya sa kangitngit.
Miadto siya sa kusina. Iyang nasuta nga naghikay diay si Mariette og pamahaw alang kanila. Lamian ang sud-an nga gitabonan sa ibabaw sa lamesa. Nakasukot si Olivero sa iyang kaugalingon kun diin og kuwarta si Mariette nga gipamalit sa maong sud-an nga pipila na man ka adlaw nga wala kini mangayo kaniyag kuwarta.
Taudtaod, nakapahiyom si Olivero. Misantop sa iyang hunahuna nga maantigo gayod nga magdaginot sa kuwarta ang iyang anak. Unya, mikaon siya sa nalangan nga pamahaw.
Nianang ikalima ang takna sa kahaponon naligo si Olivero. Pagkahuman, nagdali siyang nag-ilis. May lakton siya karon. Nagsabot sila si Halima, iyang trato nga biyuda, nga magkita sila sa usa ka luhong kan-anan sa E-mall. Si Halima usa lang sa daghang mga babaye nga nalambigit karon sa kinabuhi ni Olivero.
Tuod man, sa paghiabot ni Olivero sa E-mall, diha na si Halima, naglingkod sulod sa kan-anan nga maoy kasagaran nilang abotanan. Miorder silag pagkaon. Dihang miabot na ang ilang order, nanihapon na sila.
"Abi kog dili ka na mahiabot," ni Halima taliwala sa ilang pagpangaon. "Nadugay ka man god."
"May diyotay lang kong nalanganan," tubag ni Olivero.
Gikan sa kan-anan, gidala ni Olivero si Halima sa usa ka motel. Sa counter diin unaop ang kahayag sa sugang dagitabnon, nagpa-check in sila. Naatol usab nga dihay paresan nga nagpa-check out niadtong tungora.
Pero nakugang si Olivero sa iyang nakita. Kalit lang siyang namugnaw. Ang paresan sa lalaki ug babaye nga nagpa-check-out mao ang iyang anak nga si Mariette nga giagbayan sa usa ka lalaking gulangon na nga mao pa gayoy pagpanggawas gikan sa pribadong lawak.
Wala makasabot si Olivero sa iyang gibati niadtong tungora. Misamot na sa dihang nagkatagbo ang mga mata nila ni Mariette. Nanglipaghong siya. Nanglipaghong usab si Mariette.
Bisan sa damgo lang, wala gayod magdahom si Olivero nga silang duha si Mariette managsama diay nga nagsubay sa mangitngit nga dalan. (Kataposan)