Kana, gaw! ig-a, gaw! Mao kini ang nadungog ni Bolantoy gikan sa iyang asawa, paghimuntog niya gawas sa kuwarto nilang magtiayon. Wala gyud kuno siya masayop sa iyang pagtoo.
Kagahapon man gud, miabot iyang asawa ug adunay kuyog nga lalake, gipaila-ila kini kaniya nga iyang ig-agaw, bag-o pa nakasud og trabaho, wala pay tarong boarding house, tulo na kagabii nakatulog sa Plaza Independencia. Maayo na lang kay nagkita sila sa Sto. Niño, naluoy siya mao nga iya kunong gidala diri sa ilang balay, ari sa papuy-on samtang di pa kita’g laing boarding house ug wala pa makadawat og sweldo.
Misugot usab dayon si Bolantoy sa way pagpakita nga siya nagduda. Ug aron pud kuno pagtino kung tinuod ba iyang pagduda, giingnan niya iyang asawa! “Maayo pud nuon, kay aduna mi seminar ugma sa Argao Agro-forestry, mga tulo ka adlaw, aron duna pud kay kuyog dinhi sa balay.” Pwerteng lipaya sa iyang asawa. Nakapasamot sa iyang pagduda.
“Kana, gaw! ig-a gaw...gilok ug sakit-sakit man diay na gaw,” miagulo na pud iyang asawa nga si Melandra.
“Mga peneste!” nagpaninggit ang galamhan ni Bolantoy. Kusog ang buto-buto sa iyang dughan, mora’g drumset nga gidakol ug maayo sa rockers. Nangurog si Bolantoy.
“Sige pa, gaw! iduso pa, gaw...bahalag sakit, lami na kaayo sa akong paminaw!” Miagulo na pud si Melandra, nga nakapatulo intawon sa luha ug sip-on ni Bolantoy nga niabot sa iyang baba. Parat man diay kuno iyang sip-on.
Tungod sa kalagot. Nanukad si Bolantoy, aron banggaan ang sira diin didto sa sud iyang asawa ug giingong ig-agaw niini, dungan ang pagsyagit “Yaahh!!! Ig-agaw? Igkagabii, magkinabaw!” Blag! dag! tag! Naguba ang sira.
“Naunsa ka Bolantoy?! Sa iyang asawa nga nakalitan.
“Nganong imo kong giingon niini? Nagtinarong man unta ko sa akong pagkabana!” Nagpiyong si Bolantoy nga namulong pinugngan ang kaisog sa iyang tingog.
“Nabuang ka Bolantoy?! Nagpa-reflex ra gani kong agaw!”
Gibuka ni Bolantoy iyang mga mata. Nakita niya nga gi-reflex gyud tuod sa ig-agaw sa iyang asawa ang lapalapa ni Melandra gamit ang kahimanan sa reflexology nga maoy ituplok-tuplok sa lapalapa nga mao diay trabaho ron sa ig-agaw ni Melandra nga iyang asawa.
‘Gi-reflex diay nimo akong asawa? Abi ko’g unsa na...ako nya’y sunod ha? Kay gi-atraytis ko, da...” mingisig hilaw si Bolantoy.
“Kakolokoy, gyud nimo Bolantoy, uy! hugaw ka man kaayo’g huna-huna...pareha man mo sa nagbasa!” Singhag sa asawa. (Kataposan)