Gula 84
May isulti pa unta tingali si Papa ug Mama apan nakabig ang ilang pagtagad sa lalaki nga migawas sa usa ka lawak. Si Roger nga mao pay pagkahuman og kaligo. Miduol kini sa among nahimutangan.
“May bisita ka man diay, Belen,” ni Roger pa.
“R-Roger, sila ang akong mga ginikanan,” maoy akong tug-an.
Sa makadiyot daw nakugang si Roger. Apan ingon sa kadali ra siyang nakabawi. Nangatahoran siya sa akong mga ginikanan. Unya kami nang duha ang nakigsulti nila ni Papa ug Mama.
Si Roger maoy detalyado kaayong mipasabot sa akong mga ginikanan mahitungod sa maong plano. Nagpasalamat ko nga wala makabuylo ang kasuko nila ni Papa ug Mama. Napuypoy sila tungod sa maayong pagpasabot ni Roger kanila.
“Panggaa baya ang among anak,” mao ray nasulti ni Mama.
“Ipasalig ko, Ma,” ni Roger pa.
Miistar sila si Papa ug Mama sulod sa pipila ka adlaw sa balay. Dihang namauli na sila sa Bohol, gipadayag ni Roger kanako ang plano nga iyang nahunahunaan.
“Gusto kong moadto sa inyong lugar, Belen,” niya pa. “Iatol lang nato sa pista.”
Wala ko makatingog. -- Sumpayan pa