Way puas nga mabati sa kabalayan ug kadalanan ang nagkadaiyang matang sa pabuto alang sa paghangop ug pagsugat sa bag-ong tuig. Hilabihang sadyaa sa tibuok siyudad.
Sa sulod sa ilang balay ni Clarita, andam na sa talad kan-anan ang media noche. Usa ka bultong litsong baboy, napulo ka mga bultong litsong manok, nagkadaiyang mga prutas, spaghette, salad, biko, budbod ug special cakes. Malipayon kaayo nga nagginaksanay sila si Clarita ug Nilo. Malipayon ang magtiayon uban ang saad ug panumpa sa mga kausaban alang sa paghangop ug pagsugat nila sa Bag-ong Tuig.
“Happy new year nimo, Clar...!” ni Nilo nga migakos sa asawa diha sa ilang hawanan.
“Malipayon ug bulahang bag-ong tuig usab kanimo, Nil...!” hugot nga gigakos ni Clarita ang iyang bana. “Unta, moabot na karon si Junior, aron magdungan ta’g simba karong tungang gabii, alang sa pagsugat nato sa bag-ong tuig...!”
“Oo, Clar! Atol sa akong pagbag-o, ipakita ko kanimo nga mobalik na ko pagsulod sa simbahan matag adlaw! Mobalik na kos Ginoo, Clar!”
“Praise the Lord, Nil! Pastilan, hagbay pa kong nangindahay ug nag-ampo sa atong Ginoo, nga unta lamdagan ang imong panghunahuna aron hingpit na nimong biyaan ang imong mga bisyo, aron magkahiusa kita pagbalik diha sa atong pagkasakop sa Servant Community Charismatic Renewal...!”
“Isaad ko kanimo, Clar, nga atol sa pag-abot sa bag-ong tuig, hingpit na nimong makita ang akong kausaban ug mopukos na ko sa tanang kalihokan sa atong Servant Community, God-centered na ko ug hingpit na nakong biyaan ang akong bisyo sa bulangan ug pagsugal sa madyong...”
Hugot nga gigakos na usab ni Clarita si Nilo ug maoy pag-abot ni Junior nga mapahiyumon. Tagsatagsang gigakos sa bugtong ulitawong anak sila si Nilo ug Clarita.
“A prosperous new year ninyong duha, Pa, Ma...!”
“Maayo kay sayo kang mipauli, Jun! Magdungan ta’g panimba sa tungang gabii karon aron sa pagsugat sa bag-ong tuig...!” gihalog usab ni Clarita si Junior.
“Abi ko’g buntagan na sab kas imong mga barkada, Jun, ug dili na mouli sa atong balay ning gabhiona...!”
Nagpanglingo si Junior nga migakos na usab nilang Nilo ug Clarita.
“Isaad ko kaninyo karon, Pa, Ma, nga magbag-o na ko! Aduna nay hingpit nga kausaban sa akong kinabuhi! Mouban na ko kaninyo sa Servant Community! Mobalik na ko’s Ginoo, Pa, Ma! Biyaan ko na ang pagkahilig ko sa pagpakigbarkada. Talikdan na nako ang paghithit sa ginadiling druga. Ug mangaplay na ko’g trabaho nga haom sa kursong akong natapos sa kolehiyo! Sa laktod, magbag-o na ko ug mag-usab nas akong kinabuhi atol sa pag-abot sa bag-ong tuig...!”
Nakahilak si Clarita nga mipadayon sa paggakos ni Junior, ingon man ni Nilo.
“Praise the Lord! Praise the Lord nga adunay hingpit na nga kausaban sa inyong kinabuhi, Nil, Jun! Maghiusa tas Ginoo alang sa bag-ong tuig!
Ug unya, nagdungan sa pagsinggit ang amahan, inahan ug anak nga hupong sa kamalipayon.
“Bulahang bag-ong tuig! Bulahang bag-ong tuig...!” (Kataposan)