Kasadya ning taknaa

Mirepeke sa kadalanan ang nagkadaiyang pabuto sa Pasko. Daw gisangag ang tibuok siyudad sa mga butobuto sa mga rebentador, bawang, whistle bomb ug kuwitis. Misulbong usab ang diskohananong awit sa Pasko nga gibulhot sa mga sound system sa kadalanan ug kabalayan. Timaan sa mainitong paghangop sa Pasko! Pasko na gyud!

"Kasadya ning taknaa....!" mipatigbabaw ang tingog sa mga mananaygon sa kadalanan nga misugat ug mihangop usab sa pag-abot na sa Pasko.

Apan luyo sa hudyaka ug kasadya sa tanan atol ning paghangop sa Pasko, ania karon si Tikoy sa Fuente Osmeña, nag-inusarang naglingkod sa sementadong lingkuranan, ilawom sa dakong punoan sa kahoy. Wa siya’y kadasig. Lawom ang iyang pinsada. Nagkitabkitab ang iyang baba. Unya, mokalit siya og katawa.

"Ha-ha-ha-ha! Pasko na sab! Ngiga god! Pasko na ba? Pinaskohan bi....!"

Unya, mokalit lang sab sa paghilak si Tikoy.

"Hu-hu-hu-hu! Kasadya ning taknaa....! Asa ka sadya! Sadya god tatot! Way kasadya ang Pasko nako! Kabos ko! Purdoy ko! Wa ko’y nahot! Hu-hu-hu!"

Gikan pa sa sinugdanan, usa si Tikoy nga makitang maglaroylaroy sa kadalanan sa siyudad matag adlaw. Lat-ok iyang pamiste. Bulingit iyang pamayhon. Larawan siya sa usa ka tawong nawad-an og pangisip. Way nasayod taga diin siya ug kinsa ang iyang paryente. Bisan asang eskina sa kadalanan, siya makitang maghigda panahon sa kagabhion. Magaligad siya sa aseras. Magpangayo og salin nga pagkaon. Magpangabkab og bahaw'ng mga pan sa naglindok nga basurahan. Giyam-iran siya sa katilingban.

"Tikoy buang...!"

"Tikoy pahongpahong...!"

"Tikoy paru....!"

"Tikoy dako’g kargada...!"

"Tikoy buogon....!"

Mga biaybiay ug yagayaga gikan sa kabataan ang maani ni Tikoy, ilabi na matag kasaulogan sa Pasko. Ug taliwala sa kasadya nga gibati sa katawhan ning mga taknaa aron sa paghangop sa Pasko inigkatungang gabii, ania karon si Tikoy nga blanko gihapon ang kaugalingon nga naglakaw sa dalan. Wa niya panumbalinga ang nagkadaiyang pabuto sa Pasko nga mohagsa haduol kaniya. Dili gani siya mahaigpot sa makabungol nga butobuto sa bawang ug whistle bomb nga mohagsa sa iyang tiilan.

Mirepeke na usab sa kadalanan ang nagkadaiyang pabuto sa Pasko. Usa ka saag nga bala sa armas-de-fuego nga milagbas sa bukobuko ni Tikoy. Nahagsa siya sa dalan.

Nagnuod gayud ang panahom sa nagduhiraw nga kaisipan ni Tikoy nga way kasadya ang Pasko alang kaniya. Oo, wa na gyu’y kasadya sa Pasko nga iyang matagamtaman hangtod sa kahangtoran. (Kataposan)