Nagakakusog ang lihok sa lawas ni Evan. Bisan lisod kaayo ang iyang kahimtang nga naghigda sa lingkoranan sa bus, naningkamot si Destiny nga makaalalay sa lalaki. Gusto siyang magdali aron matapos na ang makalilisang daman nga nahitabo sa ilang kinabuhi.
Nahuman ang pasundayag. Ingon sa natagbaw ang mga adik sa performance nila ni Destiny ug Evan. Nag-ilis dayon sila sa ilang sapot.
Gimandoan sa usa ka adik ang driver nga pahunongon ang bus. Abtik nga mituman ang driver. Paghunong sa sakyanan, gipakanaog silang tanan mga pasahero sa mga adik. Ang mga pasahero nga gilubatlobatan pa sa kalisang bisan pa nga nakasaksi sa usa ka talagsaong salida, naglumba sa pagpanganaog. Minunot usab sila si Destiny ug Evan.
Dihang nakakanaog na ang tanang mga pasahero, mipasutoy sa pagpadagan ang drayber sa bus nga maoy gisakyan sa mga adik sa ilang pag-ikyas.
Awaaw na ang dapit nga ilang naabtan. Layo na sab sa highway. Nanglakaw sila balik ngadto sa highway aron pagpangita'g kasakyan.
Sila si Destiny ug Evan mibulag sa panon sa mga pasahero nga nanglakaw. Dili sila buot nga may makaila kanila. -- Sumpayan pa