Gula 55
Daw maglisod ko pagtuo sa gipangbutyag ni Galen kanako.
Pagkaugma, mikuyog gyud ko ni Galen ngadto sa La Union aron pagsugat sa iyang suking palitanan og ginadiling drugas!
Sa akong kaugalingong paghimo’g assessment sa akong binuhatan, mas grabe na ang akong pagpaulipon sa daotang bisyo karon kay sa kaniadto. Kaniadto, sa sexual pleasure ra ko nagpaulipon. Apan karon nagumon na ko sa bisyo sa ginadiling drugas. Grabe na ni!
Usa ka higayon niana, nananghid si Galen nako nga moadto siya sa Manila. May tambongan siyang seminar alang nilang mga empleyado sa Philpost nga adto ipahigayon sa kaulohan. Sa wala pa molarga si Galen paingon sa Manila, gitagbaw una namo ang among kaugalingon pagtagay sa lawasnong kalipay.
Samtang didto si Galen sa Manila, maoy gihimo kong kalingawan ang pag-internet aron pagpukan sa kalaay. Nag-open ko’g friendster account.
Sa internet nakakaplag ko’g bag-ong diversion sa kinabuhi. Bag-ong kalingawan. Bag-ong paagi sa pagpatay sa mga oras sa kalaay. Nalingaw ko sa pagpakig-chat sa lainlaing mga personahe nga nailhan ko lang sa ngalan nga akong nakaplagan sa friendster.
Usa sa nahimo kong chatmate mao si Roger. Sa iyang pagpaila nako, usa siya ka seaman. Usa ka international cargo vessel ang barko nga iyang gitrabahoan. Modunggo ang barko nga iyang gisakyan kausa matag bulan sa puwerto sa Batangas ug Cebu. -- Sumpayan pa