Gula 20
“Lain na sab to nimong biktima?”
“Biktima gud tawon. Unsay pagtuo nimo nako, kriminal?”
“Di ba gyud mahimong di ka na lang manguyab, Kuya?”
“Ngano man? Pastilan, pagkadakong demalas hinuon sa akong kinabuhi kon di na ko manguyab. Wa na koy kalingawan.”
“Mao kanay akong gikahadlokan. Giduwa-duwaan lang nimo ang mga babaye. Wa ka ba mahadlok nga magabaan? Ug ako ang maigo sa gaba sa imong pagbinuang sa mga babaye? Hinumdomi nga babaye sab ko.”
“Gaba gud tawon. Toa ra nang gaba sa lubot sa kabayo.”
“Moingon ka lang niana karon kay wa pa man moabot ang gaba nimo.”
“Di na lang ta maglalis bahin niana, uy, kay kapoy na kaayo na. Niay maayo, ay, aron magkasinabot na ta.”
“U-unsa man kana?”
“Dugay na man gyud nga nanguyab nimo si Devin. Nganong di mo na man lang hinuon siya sugton?”
“U-unsa?”
“Sugta na lang si Devin aron pareho na ta. Aron ba sab maka-experience ka kon unsa diay kanindot kon duna tay uyab.”
“Di, ko uy. Wa ko mahigugma nianang tawhana.” -- Sumpayan pa