Gula 86
Nalimpiyohan gayod ni Bradley ang iyang ngalan. Ang testimoniya ni Sandra maoy nagmatuod nga dili siya kidnaper kundili salida lang ni Col. Rivera kadtong tanan.
“Mamauli na kami sa Davao ugma,” matud ni Sandra sa ilang paggawas gikan sa buhatan ni Col. Antipon. “Salamat sa imong pagtabang nako. Dili ko kini mahimong kalimtan.”
“Kanus-a kita magkita pag-usab?” sukit ni Bradley.
“W-wala ko masayod. B-basin dili na kita magkita.”
“U-unsa? U-unya... kadtong nahitabo nato?”
“Kalimti na kadto. Isipang tipik na kadto sa kagahapon.”
“Dili ingon niana kasayon ang paghikalimot, Sandra.”
“Kun mahimo nako, walay katarongan nga dili ka makahimo. Nagkinahanglan nimo si Debra. Nalimot ka nga gusto na siyang makigminyo nimo?”
Wala makatingog si Bradley.
“Asikasoha ang relasyon ninyo ni Debra, Bradley,” ni Sandra pa. “Ug good luck sa umaabot ninyong kasal.”
Dayon mitalikod si Sandra ug mibiya sa atubangan ni Bradley. Wala makasabot si Bradley samtang misunod pagtan-aw kang Sandra nga nagkalayo.
Adlaw’ng Domingo. Si Bradley rang usa sa balay. Ang iyang inahan atua sa naandan niining trabaho matag adlaw, ang pagdumala sa restaurant niini nga nahimutang sa dalan sa Manalili.
Nahibalik na sa normal ang kinabuhi ni Bradley. Apan may mga higayon nga bation niya ang kahaw-ang sa iyang dughan. -- Sumpayan pa