Gula 81
“Hatagan namo kamo’g lima ka gutlo sa pagsurender,” miusab pagpamulong si Col. Antipon ginamit ang megaphone. “Kun dili kamo moampo, mapugos kami sa pagdakop kaninyong patay.”
Apan napupos na lang ang lima ka gutlo nga gitagal ni Col. Antipon, ingon sa wala gayo’y timailhan nga mosurender ang mga tawo nga maoy misugat sa shipment sa mga kontrabando.
Gihatagan ni Col. Antipon og ultimatum ang mga tawong armado. Apan gipabuthan hinuon sila sa maong mga tawo. Napugos pagbalos sila si Col. Antipon. Nahitabo ang pinusilay.
Ug sanglit maayong pagkapahimutang nila ni Col. Antipon, sayon ra nilang gilupig ang mga kaaway.
Milugsong si Bradley ngadto sa lungsod sa Alcoy nianang pagkaugma aron pagpangumpra. Nahurot na ang pinalit nilang mga pagkaon sama sa bugas ug mga delata.
Mokuyog unta si Sandra apan wala mosugot si Bradley. Delikado kun makita silang duha nga magkuyog sa mga tawo nga nangita kanila. Maayo man kun magbinugtong si Bradley kay nasuheto man kini sa lungsod sa Alcoy. Wala na lang mamugos si Sandra.
Nahibilin si Sandra sa balay nga ilang giistaran. Gibati niya ang tumang kalaay samtang nagpaabot nga mahibalik si Bradley. Mingaw ug hilit man gud kaayo ang dapit nga nahimutangan sa balay nga ilang gipuy-an.
Samtang nag-inusara, walay laing nahimo si Sandra gawas sa paghanduraw sa mga panghitabo sa iyang kinabuhi. Wala niya kalikayi ang paghunahuna sa daw aksidente nga pag-abot ni Bradley sa iyang kinabuhi. -- Sumpayan pa